Hyseni me dedikim për Sherafedin Kadriun, vlerëson kontributin dhe figurën e tij
Kryetari i Komunës së Gjilanit, Alban Hyseni, ka reaguar me një mesazh të ndjerë pas lajmit për ndarjen nga jeta të studiuesit dhe poetit të njohur, Sherafedin Kadriu.
Përmes një dedikimi të publikuar në profilin e tij, Hyseni ka shprehur pikëllimin e thellë për humbjen e një figure të rëndësishme të kulturës shqiptare, duke e cilësuar Kadriun si një kontribuues të jashtëzakonshëm në letërsi, trashëgimi kulturore dhe edukimin e brezave të rinj.
“Me pikëllim të thellë mora lajmin për ndarjen nga jeta të studiuesit, poetit dhe veprimtarit të shquar të kulturës, Sherafedin Kadriu. Kontributi i tij i çmuar në letërsinë shqipe, në trashëgiminë kulturore dhe në edukimin e brezave të rinj do të mbetet i paharruar”, ka shkruar Hyseni.
I pari i Gjilanit ka theksuar se Kadriu ishte një zë i përkushtuar i kulturës dhe një shembull i rrallë i angazhimit intelektual dhe njerëzor, duke lënë gjurmë të pashlyeshme në jetën kulturore të vendit.
Në mesazhin e tij, Hyseni ka rikujtuar edhe angazhimin e të ndjerit në vitet e fundit në Qendrën Rajonale për Trashëgimi Kulturore në Gjilan, ku ai kontribuoi në ruajtjen dhe promovimin e vlerave tona kulturore.
Duke e përmbyllur reagimin, kryetari i Gjilanit u ka shprehur ngushëllime familjes, miqve dhe gjithë komunitetit kulturor, duke nënvizuar se kujtimi për Sherafedin Kadriun do të mbetet i përjetshëm.
