Haziri zbulon kandidatin e LDK-së për president, në rast të marrëveshjes me LVV-në
Deputeti i Lidhjes Demokratike të Kosovës, Lutfi Haziri, ka bërë të ditur se kjo parti tashmë ka emra të gatshëm për t’i propozuar për president, nëse arrihet një marrëveshje me Lëvizja Vetëvendosje.
Sipas tij, kandidati i parë që do të mbështetej nga LDK-ja është kryetari i partisë, Lumir Abdixhiku.
“Natyrisht që po. Sipas rregullës sonë, kandidati i LDK-së është kandidati i parë që ne e mbështesim. Nuk është diskutuar për emra të përveçëm, përveç rasteve kur është folur për kandidatë konsensualë, që do të ishin përtej partive,” ka deklaruar Haziri.
Ai shtoi se, në rast të një marrëveshjeje me LVV-në, përveç 15 votave të deputetëve të LDK-së, do të synohej sigurimi i votave edhe nga parti të tjera.
Haziri bëri të ditur se kreu i LDK-së është duke zhvilluar aktualisht konsultime dhe bisedime të brendshme për të vlerësuar mundësinë e arritjes së një marrëveshjeje me LVV-në.
“Z. Abdixhiku është në fazën e konsultave dhe bisedave të brendshme pas takimit të parë, për të parë nëse mund të arrihet një marrëveshje,” ka thënë ai.
Tutje, ai konfirmoi se në ciklin e dytë të takimeve mes Albin Kurti dhe Abdixhikut është diskutuar pikërisht për mundësinë e një marrëveshjeje ndërmjet dy partive për çështjen e presidentit.
