Bujanoc: Pensionohet profesori Zejni Fejzullahu, përcillet me respekt nga shkolla “Sezai Surroi” në Bujanoc
Në një atmosferë të ngrohtë e emocionuese, shkolla e mesme “Sezai Surroi” në Bujanoc ka përcjellë në pension profesorin dhe ish-drejtorin Zejni Fejzullahu, pas dekadash përkushtimi në arsim.
Në fjalën e tij lamtumirëse, Fejzullahu falënderoi Zotin për shëndetin dhe forcën që ia mundësuan të përmbushte misionin e tij me nder. Ai tha se kur e nisi profesionin e mësimdhënësit kishte vetëm një dëshirë: “të isha i dobishëm”. Me kalimin e viteve, shtoi ai, arsimi u bë vetë jeta e tij.
Si drejtor, Fejzullahu tha se u përpoq që shkolla të mbetet një vatër e ngrohtë edukimi dhe respekti, një arritje që sipas tij u bë e mundur vetëm falë punës dhe mbështetjes së kolegëve.
“Nxënës të dashur, të shoh që rriteni dhe bëheni profesionistë e njerëz të ndershëm është shpërblimi im më i madh. Ju më keni mbajtur të ri në shpirt!”, u shpreh ai, duke i nxitur të mos ndalen kurrë në kërkim të dijes.
Ai shprehu mirënjohje të thellë edhe për familjen, të cilën e quajti mbështetjen më të fortë gjatë gjithë rrugëtimit.
“Sot nuk po shënojmë një fund, por një fillim të ri. Largohem me ndërgjegje të qetë, krenar për aq sa munda të jap dhe përjetësisht mirënjohës për respektin tuaj. Korridoret e kësaj shkolle dhe zërat tuaj do të mbeten gjithmonë në zemrën time”, përfundoi Fejzullahu.
Kolegët, nxënësit dhe prindërit e pranishëm e përcollën profesorin me mirënjohje dhe urime për shëndet e mbarësi në kapitullin e ri të jetës.
