Drita po merr formë: Pas përforcimeve të bujshme, kampionët testohen edhe ndaj Egnatias
Kampionia e Kosovës, Drita, po vazhdon fazën përgatitore në prag të sezonit 2026/2027, me synimin që të jetë sa më e gatshme për sfidat në Albi Mall Superligën e Kosovës dhe në garat evropiane, ku do ta përfaqësojë vendin si kampione në fuqi – shkruan TV Gjilani.
Pas rikthimit nga pushimet verore, skuadra gjilanase është vendosur në Bansko të Bullgarisë, ku po zhvillon përgatitjet intensive nën drejtimin e stafit teknik, të shoqëruara edhe me ndeshje kontrolluese.
Në miqësoren e parë, Drita u mposht nga CSKA Sofia me rezultat 4:1, ndërsa në testin e dytë pësoi humbje minimale 2:1 nga kampionia e Shqipërisë, Egnatia.
Golin e vetëm për bardhekaltrit në takimin ndaj Egnatias e realizoi mesfushori Vesel Limaj.
Pavarësisht rezultateve, ndeshjet miqësore mbeten një tregues i rëndësishëm për stafin teknik, i cili po vlerëson gjendjen fizike dhe formën e futbollistëve, si dhe po teston skema të ndryshme të lojës para nisjes së sezonit zyrtar.
Drita ka hyrë në sezonin e ri me ambicie të mëdha dhe me një skuadër të përforcuar ndjeshëm. Kampionët kanë afruar emra të njohur si Igball Jashari, Agan Mjaki, portierin Altin Bytyçi dhe futbollistin belg William Baeten. Njëkohësisht, klubi ka siguruar vazhdimin e bashkëpunimit me sulmuesin premtues Mike Arthur, i cili ka rinovuar kontratën deri në vitin 2030.
Përveç përforcimeve në fushë, bardhekaltrit kanë bërë ndryshime edhe në stafin profesional, duke angazhuar trajnerin e mirënjohur kondicional Arsim Tërshani, me synimin për të ngritur edhe më tej nivelin fizik të ekipit.
Me një përbërje të re dhe objektiva të larta, Drita synon të mbrojë titullin kampion në Kosovë dhe të paraqitet denjësisht në arenën evropiane, ndërsa ndeshjet përgatitore shihen si pjesë e domosdoshme e procesit të ndërtimit të formës optimale të skuadrës.
