371 kandidatë në garë për 34 pozita të prokurorëve të rinj të shtetit

Këshilli Prokurorial i Kosovës ka mbajtur testin kualifikues për 371 kandidatë që synojnë të bëhen prokurorë të shtetit. Nga 34 pozitat e shpallura, dhjetë janë të rezervuara për komunitetin serb.

Testi kualifikues është mbajtur sot, më 7 nëntor, në ambientet e Akademisë së Kosovës për Siguri Publike në Vushtrri, në kuadër të procesit të rekrutimit të 34 prokurorëve të rinj, të cilët pritet të emërohen në prokuroritë themelore të Republikës së Kosovës.

Sipas të dhënave të Këshillit Prokurorial të Kosovës (KPK), në testim kanë marrë pjesë 371 kandidatë, prej të cilëve 174 femra dhe 197 meshkuj.

KPK ka bërë të ditur se procesi i hartimit dhe administrimit të testit është zhvilluar nën parimet e transparencës, integritetit dhe trajtimit të barabartë. Për të garantuar këto standarde, pyetjet janë hartuar në ditën e testimit, në prani të vëzhguesve dhe monitoruesve vendorë e ndërkombëtarë.

Procesi është mbikëqyrur nga kryetari i Komisionit për Rekrutimin e Prokurorëve të Shtetit, Arian Gashi, së bashku me anëtarët e tjerë të komisionit. Mbarëvajtjen e testimit e kanë përcjellë edhe përfaqësues të EULEX-it, OSBE-së dhe organizatës AVONET.

Pas përfundimit të testit kualifikues, kandidatët që vazhdojnë garën do t’u nënshtrohen fazave të tjera të përzgjedhjes, përkatësisht testit me shkrim dhe intervistimit.

Këshilli Prokurorial i Kosovës ka ritheksuar se përzgjedhja e prokurorëve të rinj do të mbështetet në meritë, profesionalizëm, transparencë dhe paanësi, në përputhje me legjislacionin në fuqi.