Bibliotekat e shkollave në Kamenicë furnizohen me mijëra libra të rinj
Shkollat e Komunës së Kamenicës janë pajisur me 6750 lektyra dhe romane shkollore, falë një donacioni të siguruar nga Shtëpia Botuese “Berati”, me vlerë rreth 20 mijë euro.
Donacioni është pranuar nga kryetari i Komunës së Kamenicës, Kadri Rahimaj, së bashku me drejtorin e Arsimit, Selami Klaiqi.
Sipas autoriteteve komunale, librat do të shpërndahen në të gjitha shkollat e komunës, me synim pasurimin e bibliotekave shkollore dhe krijimin e kushteve më të mira për zhvillimin e kulturës së leximit tek nxënësit.
Nga Drejtoria Komunale e Arsimit është vlerësuar se ky kontribut do të ndikojë pozitivisht në procesin edukativ dhe në avancimin e dijes për gjeneratat e reja.
Përfaqësuesit komunalë kanë falënderuar Shtëpinë Botuese “Berati” për mbështetjen e dhënë në sektorin e arsimit.
