Rekord historik me fanellën bardhekaltër – Leotrim Kryeziu hyn mes legjendave të FC Prishtinës
Sulmuesi nga Rogana e Dardanës, vendi që njihet si vatër e talenteve në Anamoravë, vazhdon të shkruajë histori në futbollin kosovar.
Me golin e realizuar në përballjen ndaj FC Ballkani, sulmuesi Leotrim Kryeziu ka hyrë zyrtarisht në historinë e FC Prishtina si golashënuesi i dytë më i mirë i klubit në periudhën pasluftës.
“Leo” tashmë numëron 48 gola me fanellën bardhekaltër, duke kaluar Azem Ahmetin në listën historike të realizatorëve. Para tij mbetet vetëm legjenda Sheremet Jusufi me 60 gola të realizuar.
Përveç rekordit të golave, Kryeziu ka zhvilluar edhe 228 paraqitje me FC Prishtinën, duke dëshmuar besnikëri, vazhdimësi dhe kontribut të madh për klubin kryeqytetas.
Arritja e tij po konsiderohet krenari e madhe për Roganën e Dardanës dhe gjithë Anamoravën, zonë e njohur ndër vite si vatër e sportistëve dhe talenteve të futbollit.
