Zyra e Kryeministrit pasi Kurti u mashtrua nga komedianët rusë: Rusia është e fiksuar pas Kosovës
Qeveria e Kosovës ka dalë më një reagim publik, pas publikimit të një videoje të kryeministrit Kurti, ku shihet duke u mashtruar nga dy komadianë rusë, me pretendimin se po flet me presidentin e Letonisë.
Kurti ka rënë pre e dy rusëve të njohur si Vovan dhe Lexus, duke menduar se po komunikonte në telefon me presidentin e Letonisë. Ata kanë publikuar një video në njërën nga llogaritë e tyre, ku Kurti dëgjohet duke folur për opozitën në Kosovë, mediat, Shtetet e Bashkuara të Amerikës e të tjera.
Në reagimin e ZKM-së thuhet se ngjarja ka ndodhur dy ditë pas zgjedhjeve të 9 shkurtit, më 11 shkurt, ku sipas tyre për shkak të mesazheve të shumta të urimit që vinin për Kurtin, nuk kanë arritur ta verifikojnë thirrjen.
“Ngjarja ka ndodhur më 11 shkurt, pak pas zgjedhjeve të 9 shkurtit, në një periudhë kur kryeministri Kurti po pranonte mesazhe të shumta urimi dhe thirrje për rezultatin e zgjedhjeve. Për shkak të kohës, jo gjithmonë ishte e mundur të kryheshin verifikimet e plota të çdo telefonate”, thuhet në reagim.
Tutje, nga Qeveria kanë thënë se kjo e verifikon se “Rusia është e fiksuar pas Kosovës”.
“Ky incident fatkeq përforcon atë që kemi e ditur prej kohësh: Rusia është e fiksuar pas Kosovës dhe vazhdon ta ketë cak vendin tonë. Gjatë fushatës zgjedhore për zgjedhjet parlamentare të 9 shkurtit, Sputnik Serbia dhe Russia Today (RT) publikuan mbi 60 lajme të rreme dhe artikuj dezinformues, duke ndërhyrë në procesin tonë demokratik, siç dokumentohet nga Misioni i BE-së për Vëzhgimin e Zgjedhjeve”, thuhet mes tjerash në postim.
