Talentja nga Gjilani, Ola Emini, botohet në Paris: Eseja e saj prezantohet para lexuesve francezë
GJILAN – Një sukses i veçantë për letërsinë e re shqiptare vjen nga Gjilani. Talentja e re Ola Emini është prezantuar para lexuesve francezë me esenë e saj “Sikur të kisha edhe një jetë tjetër”, e cila është botuar në revistën letrare RALM në Paris.
Ky botim përbën një arritje të rëndësishme për autoren e re dhe një dëshmi se po rritet një brez i ri krijuesish, të frymëzuar nga dashuria për leximin, letërsinë dhe fuqia e fjalës së shkruar.
Në një prononcim për TV Gjilani, Ola Emini ka rrëfyer emocionet e këtij momenti të veçantë.
“Pas këtij libri fshihet shumë punë, net pa gjumë dhe shumë dashuri për letërsinë”, është shprehur ajo.
Autorja ka bërë të ditur se dëshira e saj është që krijimtaria letrare të gjejë hapësirë edhe në vendlindjen e saj, në Kosovë, e veçanërisht në Gjilan, prej nga e ka origjinën.
Sipas saj, mbështetja më e madhe për autorët e rinj është promovimi i veprave të tyre, ndërsa thekson se synimi kryesor mbetet që libri të arrijë tek lexuesit.
“Për mua ka rëndësi që libri të gjejë destinacionin e duhur – tek lexuesit e rinj. Besoj se krijimtaria letrare, ashtu siç e do tradita, e gjen vetë rrugën drejt lexuesit kur lind nga pasioni dhe përkushtimi.”
Në fund të mesazhit të saj përmes TV Gjilani, Ola ka falënderuar të gjithë ata që e kanë mbështetur në këtë rrugëtim.
“Ju falënderoj nga zemra për kohën dhe vëmendjen tuaj. Ju uroj çdo të mirë!”
Një falënderim i veçantë nga autorja i është drejtuar edhe Patrick Cintas dhe ekipit editorial të revistës RALM, për mundësinë e krijuar që autorët e rinj të prezantohen para publikut ndërkombëtar.
TV Gjilani i uron Olës suksese të mëtejshme, me bindjen se ky është vetëm fillimi i një rrugëtimi të gjatë dhe të suksesshëm në botën e letërsisë.
