Kurti paralajmëron rrezikimin e Lojërave Mesdhetare, kritikon mospajtimet me Prishtinën – “libri me të cilin kemi aplikuar është në shpërputhje me master-planin”
Kryeministri i Kosovës, Albin Kurti, ka shprehur shqetësimin për mospajtimet rreth organizimit të Lojërave Mesdhetare 2030, duke thënë se mungesa e unitetit ndërmjet institucioneve të përfshira po e vë në rrezik realizimin e këtij projekti.
Duke iu përgjigjur pyetjeve të deputetëve në Kuvend, Kurti ka theksuar se bashkëpunimi me Komitetin Olimpik të Kosovës ka qenë i mirë, por ka shprehur pakënaqësi me raportet dhe bashkëpunimin me Komunën e Prishtinës.

Ai ka kritikuar edhe faktin që debatet dhe mospajtimet e zhvilluara në mbledhjet e Komitetit për organizimin e Lojërave Mesdhetare po bëhen publike përmes deklarimeve dhe akuzave të ndërsjella.

“Kjo mungesë e unitetit të brendshëm na ka sjellë në këtë pikë kur po rrezikohet organizimi i Lojërave Mesdhetare 2030. Unë vazhdoj të jem optimist, por jam optimist i përmbajtur, sepse kush bën mirë nuk e ka kollaj të shtyhet me dikë që e bën të kundërtën”, ka deklaruar Kurti.
Një nga çështjet kryesore të mospajtimeve, sipas tij, lidhet me dallimet ndërmjet librit të aplikimit për organizimin e lojërave dhe draftit të master-planit që u është prezantuar institucioneve.

Kurti ka thënë se dokumenti fillestar i aplikimit ishte gjithëpërfshirës dhe parashihte projekte që do t’i shërbenin Kosovës edhe pas përfundimit të garave. Megjithatë, sipas tij, drafti i master-planit ka devijuar nga ky koncept, duke lënë jashtë rrafshin e Dukagjinit.
Ai ka kundërshtuar veçanërisht zhvendosjen e garave të xhudos nga Peja në Prishtinë, duke e cilësuar këtë vendim si të padrejtë, pasi në Pejë janë investuar pesë milionë euro në infrastrukturën për këtë sport.
“S’mund ta paramendoj që garat për xhudo të mos mbahen në Pejë. Ato janë paraparë me u mbajt në Prishtinë. Është e padrejtë. Pesë milionë euro i kemi investuar për xhudo në Pejë dhe tash na u dashka që garat për xhudon të mbahen në Prishtinë. Kjo është absurditet”, ka thënë Kurti.
Ai ka bërë thirrje që debatet dhe mospajtimet të zgjidhen brenda mekanizmave përkatës institucionalë, ndërsa vendimet e marra me shumicë votash të respektohen nga palët e përfshira.
Pavarësisht shqetësimeve për zhvillimet rreth master-planit dhe bashkëpunimit ndërinstitucional, Kurti ka thënë se vazhdon të jetë optimist për organizimin e Lojërave Mesdhetare 2030, por me rezerva për shkak të situatës aktuale.
