Drejtuesit e Spitalit të Gjilanit vizitojnë Preshevën, Sinani shpreh mirënjohje për shërbimet ndaj qytetarëve të Luginës
Kryetarja e Komunës së Preshevës, Ardita Sinani, ka pritur në takim drejtorin e Spitalit të Përgjithshëm të Gjilanit, Dr. Afrim Cana, i shoqëruar nga ekipi i tij, me të cilët ka diskutuar për bashkëpunimin dhe shërbimet shëndetësore që ky institucion u ofron qytetarëve të Luginës së Preshevës.
Gjatë takimit, Sinani ka shprehur mirënjohje për përkushtimin dhe gatishmërinë e stafit të Spitalit të Gjilanit për t’u ofruar shërbime mjekësore qytetarëve të Preshevës dhe viseve të tjera të Luginës.

Sipas të dhënave të prezantuara nga kryetarja Sinani, vetëm gjatë periudhës janar–tetor të këtij viti, në Spitalin e Përgjithshëm të Gjilanit janë realizuar 2,050 kontrolle mjekësore dhe janë hospitalizuar 180 pacientë nga Lugina e Preshevës.

Në përbërje të delegacionit të Spitalit të Gjilanit ishin edhe Dr. Nezir Demolli, Dr. Veprim Presheva dhe kryeinfermierja Sada Ismaili.

Sinani ka vlerësuar se pas këtyre shifrave qëndron puna dhe përkushtimi i profesionistëve shëndetësorë, duke falënderuar ekipin e spitalit për trajtimin e pacientëve dhe mbështetjen e familjeve të tyre.
Ajo ka theksuar se solidariteti dhe bashkëpunimi në fushën e shëndetësisë kapërcejnë kufijtë, duke e cilësuar raportin me Spitalin e Gjilanit si një dëshmi të rëndësishme të kësaj fryme.
