Studentët nisin praktikën profesionale në Drejtorinë e Administratës së Përgjithshme në Gjilan
Në Drejtorinë e Administratës së Përgjithshme të Komunës së Gjilanit ka nisur praktika profesionale për një grup studentësh, të cilët gjatë kësaj periudhe do të angazhohen në kuadër të kësaj drejtorie për të fituar përvojë praktike në administratën publike.
Lajmi është bërë i ditur nga Drejtoria e Administratës së Përgjithshme, ku drejtori Elbasan Shabani ka bërë të ditur se, së bashku me ushtruesin e detyrës së shefit të Qendrës për Shërbim me Qytetarë, Selami Nezirin, kanë mirëpritur praktikantët në ditën e parë të angazhimit të tyre.
Sipas tij, qëllimi i kësaj praktike është t’u mundësojë studentëve përvojë konkrete pune dhe njohuri të drejtpërdrejta mbi funksionimin e administratës publike dhe shërbimet që ofron ajo për qytetarët.
Në fund, drejtori Shabani u ka uruar studentëve punë të mbarë dhe suksese gjatë gjithë periudhës së praktikës profesionale.
