Kurti për vdekjen e Hafiz Gagicës: “Ishte zëri i Kosovës në mërgatë dhe në lobimin ndërkombëtar”
Kryeministri i Kosovës, Albin Kurti, ka reaguar pas ndarjes nga jeta të veprimtarit Hafiz Gagica, duke e cilësuar si një humbje të madhe për vendin.
“Ndarja nga jeta e Hafiz Gagicës është një humbje e madhe dhe lajm i hidhur”, shkruan Kurti në një postim në rrjetet sociale.
Sipas tij, Gagica do të mbahet mend si një nga bartësit kryesorë të organizimit të mërgatës shqiptare në Gjermani dhe si një atdhetar i palodhur që nuk kurseu asgjë për jetësimin dhe forcimin e sistemit të Republikës së Kosovës gjatë viteve të ’90-ta, kur vendi ishte nën okupim.
Kurti thekson se i ndjeri ishte mik i ngushtë i Jusuf Gërvallës, një ndër aktivistët e hershëm të Lidhjes Demokratike të Kosovës në mërgatë, si dhe bashkëpunëtor i afërt i Sali Çekajt dhe presidentit Ibrahim Rugova.
Ai kujton rolin e Gagicës në lobim dhe në takimet e rëndësishme të asaj kohe, duke përmendur veçanërisht tubimin historik në Bonn më 1998. “Nuk do të harrohet asnjëherë tubimi në Bonn më 1998, për të cilin ai punoi shumë, e ku morën pjesë më shumë se 100 mijë shqiptarë që kërkuan liri për Kosovën”, citon Kurti.
Në fund të reagimit, kryeministri shpreh nderim për jetën dhe veprën e Hafiz Gagicës dhe i shpreh ngushëllime të sinqerta familjes, miqve dhe bashkëpunëtorëve të tij.
