Gjilani apel për tatimin në pronë: Pagesat me kohë, kyçe për zhvillimin e komunës
Drejtoria për Buxhet dhe Financa në Komunën e Gjilanit ka bërë thirrje që qytetarët të kryejnë me kohë obligimet për tatimin në pronë, me qëllim shmangien e kostove shtesë si interesat, gjobat dhe procedurat përmbarimore.
Sipas institucionit, këto të hyra kanë ndikim të drejtpërdrejtë në realizimin e projekteve dhe shërbimeve komunale.
Drejtori i DBF-së, Avdyl Kastrati, ka falënderuar qytetarët që tashmë po i përmbushin obligimet e tyre dhe ka theksuar rëndësinë e disiplinës fiskale. Ai ka deklaruar se “pagesa e tatimit në pronë kontribuon drejtpërdrejt në zhvillimin e projekteve dhe shërbimeve komunale”, duke e cilësuar këtë detyrim si thelbësor për funksionimin e komunës.
Në njoftim bëhet e ditur se, për shkak të vonesës në lëshimin e faturave për vitin 2026, tatimpaguesit mund t’i nxjerrin faturat përmes platformës e-Kosova ose fizikisht në komunë. Pagesat mund të kryhen në banka të licencuara, përmes e-banking, Postës së Kosovës apo platformave tjera të autorizuara, ndërsa për qytetarët jashtë vendit janë të mundshme edhe mënyra alternative të pagesës.
Sipas rregullave ligjore, personat rezidentë mund të paguajnë në dy këste (deri më 30 qershor dhe 30 shtator 2026), ndërsa jorezidentët në një këst të vetëm deri më 30 shtator 2026. Komuna paralajmëron gjithashtu se vonesat sjellin gjobë prej 10% dhe interes mujor 0.65%, si dhe masa ligjore për borxhet e papaguara, sidomos për obligime mbi 300 euro.
Në fund të njoftimit, drejtori Kastrati ka bërë një apel të drejtpërdrejtë për qytetarët që të respektojnë afatet e pagesës, duke theksuar rëndësinë e pagesës në kohë për të shmangur çdo kosto shtesë, interes, gjobë apo procedura përmbarimore.
