FIFA ndez spektaklin e Botërorit: Katy Perry kryeson super-shfaqjen para ndeshjes hapëse
Kupa e Botës 2026 pritet të nisë me një atmosferë madhështore, ndërsa FIFA ka zbuluar emrat e yjeve që do të performojnë në ceremonitë para ndeshjeve hapëse në SHBA, Meksikë dhe Kanada.
Në qendër të vëmendjes do të jetë superylli amerikan Katy Perry, e cila do të ngjitet në skenë më 12 qershor në stadiumin SoFi në Kaliforni, përpara sfidës mes SHBA-së dhe Paraguait.
FIFA ka konfirmuar se pjesë e spektaklit do të jenë edhe emra të njohur të muzikës botërore si Future, Lisa, Tyla, Anita, Remo dhe DJ Sanjoy, duke premtuar një show të jashtëzakonshëm për tifozët.
Edhe ceremonia hapëse në Meksikë më 11 qershor do të sjellë një paradë yjesh. Në stadiumin legjendar “Azteca” do të performojnë artistë si J Balvin, Alejandro Fernandez, Belinda, Mana, Danny Ocean dhe Los Angeles Azules.
Ndërkohë, Kanadaja do ta nisë aventurën e saj në Botëror me performanca nga Alanis Morissette, Michael Buble, Alessia Cara dhe Jesse Reyes, para përballjes ndaj Bosnjës dhe Hercegovinës në BMO Field.
Sipas FIFA-s, të gjitha ceremonitë muzikore do të nisin 90 minuta para fillimit të ndeshjeve, duke e kthyer startin e Botërorit 2026 në një mega-spektakël sportiv dhe muzikor.
