Kryqi i Kuq Gjilan dhe Carabinierët Italian me aksione solidariteti gjatë tetor-nëntorit
GJILAN – Kryqi i Kuq i Kosovës – Dega Gjilan, në bashkëpunim me Carabinierët Italian, ka realizuar gjatë kësaj periudhe disa aktivitete humanitare në kuadër të Muajit të Solidaritetit.
Aktiviteti i fundit u zhvillua në muajin nëntor, ku u shpërndanë pako ushqimore dhe veshmbathje për një familje në nevojë. Qëllimi ishte lehtësimi i kushteve të jetesës me afrimin e sezonit të dimrit.
Përveç këtij aksioni, gjatë muajit tetor Kryqi i Kuq Gjilan ka zhvilluar edhe dy nisma të tjera:
1. Solidaritet në shkollë
Në Gjimnazin “Zenel Hajdini” u realizua projekti “Solidaritet, Bashkëpunim dhe Mirëqenie”. Me mbështetjen e nxënësve, prindërve, donatorëve dhe psikologes së shkollës, u krijua një hapësirë rekreative me tavolinë pingpongu, dhe u ofrua ndihmë ushqimore për familjen e një nxënësi në nevojë.
2. Shpërndarje pakosh ushqimore
Gjithashtu u realizua shpërndarja e pakove ushqimore për familjet në nevojë, me kontributin e qytetarëve vullnetmirë.
Mirënjohje e veçantë për donatorët
Kryqi i Kuq Gjilan shprehu falënderimin më të sinqertë për mbështetësit e vazhdueshëm:
Qendrën Tregtare Haliti S.M, AR KATANA dhe XHEVDA MAE, të cilët çdo vit dëshmojnë përkushtim dhe humanizëm ndaj familjeve në nevojë.
Gjithashtu falënderim për të gjithë qytetarët që solidaritetin e dëshmojnë me vepra.
Solidariteti do të vazhdojë edhe gjatë muajit nëntor.
