Përfundon ndërtimi i urës në Ajnoc, investim prej 409,628 eurosh
KAMENICË – Ka përfunduar ndërtimi i urës së re në fshatin Ajnoc të Komunës së Kamenicës, ka njoftuar kryetari i Komunës, Kadri Rahimaj.
Projekti infrastrukturor është realizuar me investim prej 409,628 eurosh nga Ministria e Infrastrukturës dhe Transportit.
Sipas Rahimajt, ura moderne krijon kushte më të mira dhe më të sigurta për qarkullimin e banorëve, duke përmirësuar infrastrukturën rrugore dhe duke lehtësuar lëvizjen në këtë zonë.
“Përfundimi i këtij projekti është një hap i rëndësishëm drejt përmirësimit të kushteve të jetesës dhe rritjes së sigurisë në komunikacion”, ka deklaruar Kryetari Rahimaj.
Ai ka shtuar se investimet në infrastrukturë do të vazhdojnë edhe në pjesë të tjera të komunës, me qëllim të përmirësimit të shërbimeve dhe krijimit të kushteve më të mira për të gjithë qytetarët.
