Drita dhe Malisheva triumfojnë në xhiron e 14-të
Sot janë zhvilluar dy ndeshjet e para të xhiros së 14-të në AlbiMall Superligë. Në ndeshjen e zhvilluar në stadiumin “Sami Kelmendi” në Lipjan, Drita shënoi fitoren e dytë rresht, duke triumfuar 2:0 ndaj Prishtinës së Re.
Gjilanasit e nisën ndeshjen me qasje sulmuese dhe u shpërblyen në minutën e 21-të, kur kapiteni Rron Broja realizoi me saktësi për 1:0.
Në pjesën e dytë, Kristal Abazaj dyfishoi epërsinë në minutën e 53-të, duke vulosur fitoren dhe tri pikët e rëndësishme për skuadrën e Zekirija Ramadanit. Drita, e cila ka një ndeshje më pak të zhvilluar, aktualisht ka 23 pikë në 13 ndeshje, ndërsa Prishtina e Re mbetet në vendin e fundit me 9 pikë dhe pa fitore që nga 14 shtatori.
Ndërkohë në orët e mbrëmjes në kryeqytet, Malisheva arriti fitore të madhe si mysafire e Prishtinës, duke triumfuar po ashtu me rezultat 2:0. Skuadra mysafire kaloi herët në epërsi, kur Assane Diatta në minutën e 5-të shënoi golin e parë me fanellën e Malishevës.
Epërsia u dyfishua në minutën e 20-të, kur Altin Aliu u tregua i saktë nga pika e bardhë. Prishtina më pas pati posedim më të madh të topit dhe krijoi raste, por mungesa e konkretizimit e la skuadrën bardhekaltër pa gol dhe pa pikë.
Me këtë fitore, Malisheva ngjitet në vendin e pestë me 19 pikë, ndërsa Prishtina, pavarësisht humbjes, mbetet në krye të tabelës me 26 pikë, tre më shumë se ndjekësit më të afërt, Ballkani dhe Drita.
