Artisti nga Gjilani, Hajrush Fazliu, pritet në ASHAK nga kryetarja Justina Shiroka Pula
Gjatë takimit u diskutua për artin, kulturën dhe mundësitë e bashkëpunimit në promovimin e vlerave kombëtare – shrkuan TV Gjilani.
Artisti dhe profesori në pension, Hajrush Fazliu, me origjinë nga Gjilani, i cili prej vitesh jeton dhe vepron në Prishtinë, ka zhvilluar një takim me kryetaren e Akademisë së Shkencave dhe të Arteve të Kosovës (ASHAK), akademiken Prof. Dr. Justina Shiroka Pula.
Lajmin e ka bërë të ditur vetë Fazliu përmes një postimi, ku ka njoftuar se gjatë takimit kanë shkëmbyer mendime, përvoja dhe ide lidhur me mundësitë e bashkëpunimit në fushën e artit, kulturës dhe promovimit të vlerave kombëtare.
Me këtë rast, ish-profesori i Fakultetit të Arteve ka uruar akademiken Justina Shiroka Pula për zgjedhjen në krye të Akademisë së Shkencave dhe të Arteve të Kosovës, duke e cilësuar këtë si një vlerësim për kontributin e saj në shkencë, arsim dhe kulturë.
Në postimin e tij, Fazliu i ka uruar kryetares së ASHAK-ut suksese në ushtrimin e detyrës së re, duke shprehur besimin se angazhimi i saj do të kontribuojë në fuqizimin e rolit të institucionit në zhvillimin e shkencës, artit dhe promovimin e identitetit kulturor të vendit.
Hajrush Fazliu është një artist i njohur i arteve pamore dhe ish-profesor i Fakultetit të Arteve. Me prejardhje nga Gjilani, ai prej shumë vitesh jeton dhe vepron në Prishtinë, duke vazhduar aktivitetin e tij krijues dhe kulturor.
