Kryetari Alban Hyseni: Kompleksi i banimit të përballueshëm social, ndër projektet më të rëndësishme për familjet në nevojë
Kryetari i Komunës së Gjilanit, Alban Hyseni, së bashku me drejtorin për Urbanizëm, Planifikim dhe Mbrojtje të Mjedisit, Flakron Rexhepi, si dhe zyrtarë të tjerë komunalë, kanë vizituar nga afër punimet në kompleksin e banimit të përballueshëm dhe social.
Kompleksi do të përfshijë gjithsej 71 njësi banesore, prej të cilave 57 banesa do të jenë të destinuara për banim të përballueshëm, ndërsa 14 banesa për banim social.
Sipërfaqja e përgjithshme ndërtimore e kompleksit arrin në rreth 12.350 metra katrorë, ndërsa banesat do të ndërtohen në katër tipe të ndryshme, me sipërfaqe prej 53, 66, 77 dhe 87 metra katrorë, duke iu përshtatur nevojave të kategorive të ndryshme të përfituesve.
Kryetari Alban Hyseni tha se bëhet fjalë për një nga projektet më të rëndësishme për qytetin dhe për familjet që kanë nevojë për strehim të sigurt dhe dinjitoz.
“Vizituam nga afër punimet në projektin e banimit të përballueshëm social, një ndër projektet më të rëndësishme për qytetin tonë dhe për familjet që kanë nevojë për strehim të sigurt e dinjitoz. Ky projekt, që po realizohet në bashkëpunim me Qeverinë e Kosovës, po merr formë dita-ditës dhe do të krijojë mundësi më të mira jetese për shumë qytetarë të Gjilanit”, ka deklaruar Hyseni.
