Profesoresha nga Gjilani – Kosova, dr. Milote Sadiku, ligjëron në Universitetin e Regensburgut në Gjermani
Profesoresha nga Kosova, dr. Milote Sadiku, ka mbajtur një ligjëratë në Universitetin e Regensburgut në Gjermani, në kuadër të bashkëpunimit ndëruniversitar dhe shkëmbimit të përvojave akademike, transmeton albinfo.ch – përcjell TV Gjilani.
Ligjërata u zhvillua para studentëve të programit “Gjermanishtja si gjuhë e dytë / gjuhë e huaj” (DaZ/DaF), duke krijuar një mundësi të rëndësishme për diskutim, shkëmbim njohurish dhe perspektivash ndërkulturore mes studentëve dhe stafit akademik të universitetit gjerman.
Sipas njoftimit të Fakultetit të Filologjisë, aktiviteti u zhvillua në një atmosferë të shkëlqyer akademike dhe shërbeu si një hap i rëndësishëm në forcimin e bashkëpunimit ndërmjet institucioneve të arsimit të lartë.
Fakulteti shprehu mirënjohje për mikpritjen dhe bashkëpunimin e Universitetit të Regensburgut, duke vlerësuar rëndësinë e këtyre shkëmbimeve në zhvillimin profesional dhe akademik të stafit dhe studentëve.
Falënderim i veçantë iu adresua edhe profesoreshës Blertë Ismajli, e cila gjatë semestrit veror të vitit 2026 po qëndron si ligjëruese mysafire në Universitetin e Regensburgut, duke dhënë një kontribut të çmuar në thellimin e bashkëpunimit akademik ndërmjet dy institucioneve.
Pjesëmarrja e dr. Milote Sadikut në këtë aktivitet përbën një tjetër dëshmi të angazhimit të akademikëve nga Kosova në arenën ndërkombëtare, duke promovuar shkëmbimin e dijes, bashkëpunimin shkencor dhe afirmimin e arsimit të lartë kosovar në universitete prestigjioze evropiane.
