U mbajt aktivitet përkujtimor për Ditën e Çlirimit me nxënësit e shkollave të Kamenicës
Në kuadër të aktiviteteve për shënimin e Ditës së Çlirimit, Drejtoria Komunale e Arsimit në Kamenicë organizoi një aktivitet të veçantë përkujtimor me pjesëmarrjen e nxënësve, mësimdhënësve, veteranëve të luftës dhe qytetarëve, me qëllim të ruajtjes dhe kultivimit të vlerave të luftës çlirimtare.
Në fjalën hyrëse u theksua rëndësia e ruajtjes së kujtesës historike dhe nevoja që brezat e rinj të njohin sakrificat e atyre që kontribuan për lirinë e vendit. Të pranishmit patën mundësinë të dëgjojnë rrëfime dhe përjetime nga protagonistë të ngjarjeve historike, të cilët dhanë kontribut të çmuar në periudhat më të vështira për Kosovën.
Drejtori i Drejtorisë Komunale të Arsimit, Selami Kllaiqi, tha se ky aktivitet po organizohet për herë të parë në kuadër të manifestimeve për Ditën e Çlirimit.
“Jemi të lumtur që nxënësit e shkollave tona po bëhen gjithnjë e më të vetëdijshëm për kontributin dhe sakrificën e atyre që dhanë jetën për lirinë që ne e gëzojmë sot”, u shpreh ai.
Të pranishmëve iu drejtua edhe komandanti i Zonës Operative të Karadakut, Ahmet Isufi, i cili foli për luftën e Ushtrisë Çlirimtare të Kosovës dhe rolin e aleatëve ndërkombëtarë në çlirimin e vendit.
“Është e rëndësishme që vlerat e luftës të kultivohen nga gjeneratat e reja dhe mbi këto vlera të vazhdohet puna për ndërtimin dhe zhvillimin e Kosovës”, theksoi Isufi.
Ndërkaq, kryetari i Organizatës së Veteranëve të Luftës të UÇK-së në Kamenicë, Milaim Limoni, foli për sakrificën e dëshmorëve dhe rëndësinë e njohjes së historisë nga brezat e rinj.
“Liria që gëzojmë sot nuk erdhi rastësisht. Ajo u fitua me mund, sakrifica dhe gjakun e dëshmorëve tanë. Detyra e brezit të ri është ta ndërtojë Kosovën përmes dijes, kulturës dhe përgjegjësisë qytetare”, tha Limoni.
Programi artistik u pasurua me interpretime nga nxënësit e shkollave të Kamenicës. Nxënësja Elona Lipovica recitoi poezinë “Nëna” të Ismail Kadaresë, ndërsa nxënësja Miradie Arifi interpretoi poezinë “Tung Europë” të Ali Podrimjes. Gjithashtu, nxënësit e klasave VIII dhe IV interpretuan dramën “Pritja e nënlokes”, e cila u mirëprit me duartrokitje nga të pranishmit.
Aktiviteti u përmbyll me mesazhe mirënjohjeje për të gjithë ata që kontribuuan për lirinë e Kosovës, si dhe me urimet për Ditën e Çlirimit. Njëkohësisht, u përcoll mesazhi se ruajtja e kujtesës historike dhe kultivimi i vlerave kombëtare mbeten detyrë e përhershme e brezave të rinj.
