Komuna e Kamenicës shpërblen maturantët me udhëtim në Europë
Kryetari i Komunës së Kamenicës, Kadri Rahimaj, ka bërë të ditur se të gjithë maturantët e kësaj komune do të jenë pjesë e një udhëtimi në Europë, si formë vlerësimi për angazhimin dhe suksesin e tyre gjatë shkollimit.
Lajmin e ka kumtuar vetë Rahimaj, i cili së bashku me drejtorin e Arsimit ka vizituar nxënësit gjatë përgatitjeve për testin e maturës, ku edhe i ka njoftuar për këtë organizim.
“Ju faleminderit që na bëni krenarë. Le të jetë ky udhëtim një dhuratë nga ne për ju”, është shprehur Rahimaj para maturantëve.
Ai ka bërë të ditur se destinacioni i udhëtimit do të publikohet në ditët në vijim.
Sipas Komunës së Kamenicës, ky organizim synon të motivojë dhe mbështesë të rinjtë, duke u ofruar atyre një përvojë të veçantë pas përfundimit të një etape të rëndësishme arsimore.
Ky veprim është mirëpritur nga maturantët, të cilët e kanë cilësuar si një kujtim të veçantë dhe një shpërblim simbolik për përkushtimin e tyre gjatë viteve të shkollimit.
