Universiteti Publik “Kadri Zeka” diskuton mundësitë e bashkëpunimit me WSB University nga Polonia
Në Universitetin Publik “Kadri Zeka” në Gjilan është mbajtur takimi i radhës me përfaqësuesin e WSB University nga Polonia, z. Denis Spahija, ku u diskutuan mundësitë e bashkëpunimit dhe programet e trajnimit që ky universitet ofron për stafin akademik dhe studentët e Fakultetit të Shkencave Sociale të UKZ-së.
Gjatë takimit u prezantuan module dhe trajnime të strukturuara, të cilat synojnë zhvillimin e kompetencave bashkëkohore në mësimdhënie inovative, ndërmarrësi dhe punësueshmëri. Për stafin akademik, programet përfshijnë trajnime certifikuese në ENTER-CBL, dizajnimin e mësimit të bazuar në sfida reale (Challenge-Based Learning), si dhe micro-learnings, të cilat shërbejnë si njësi të shkurtra për zhvillimin e temave kyçe të lëndëve dhe përmirësimin e praktikës pedagogjike.
Ndërkaq, për studentët e Fakultetit të Shkencave Sociale janë ofruar module të orientuara drejt zhvillimit të aftësive ndërmarrëse, përmes micro-learnings dhe Entrepreneurs Courses, me fokus në krijimin e ideve inovative dhe modeleve të biznesit të qëndrueshëm me ndikim pozitiv.
Stafi akademik dhe studentët e Fakultetit të Shkencave Sociale të Universitetit Publik “Kadri Zeka” do t’i shfrytëzojnë këto mundësi për të avancuar njohuritë dhe aftësitë e tyre profesionale, duke u pajisur me kompetenca praktike në fushat e inovacionit, sipërmarrjes dhe metodologjive moderne të të nxënit.
