Shengyl Imami rikthen kujtimet nga vitet e arta të Dritës, kur futbolli ishte pasion dhe krenari gjilanase
Ish-futbollisti dhe afaristi i njohur gjilanas, Shengyl Imami, ka ndarë me ndjekësit e tij një fotografi nga koha kur ishte pjesë e FC Drita, duke rikthyer kujtimet e një periudhe të rëndësishme të futbollit në Gjilan, gjatë viteve ’70 dhe ’80 të shekullit të kaluar.
Përmes fotografisë së publikuar në rrjetet sociale, Imami ka shprehur edhe një herë lidhjen e tij të veçantë me klubin bardhekalter, të cilin e cilëson si simbol të traditës dhe krenarisë së qytetit.
“Klubi i krenarisë, traditës dhe pasionit të futbollit gjilanas! Drita është më shumë se një klub. Është histori, emocion dhe dashuri e përhershme. DRITA – KRENARIA E GJILANIT!”, ka shkruar Imami në përshkrimin e fotografisë.
Përtej këtij kujtimi fotografik, Shengyl Imami ka një histori të gjatë në futbollin gjilanas dhe atë kosovar. Dashuria e tij për futbollin nisi që në moshë të hershme. Në vitin 1971, kur ishte vetëm 15-vjeçar, ai u aktivizua në ekipin e parë të KF Tekstili në Gjilan, ndërsa më vonë, gjatë shkollimit në Prishtinë, u bë pjesë e juniorëve të KF Prishtina.
Në vitin 1973/74, Imami iu bashkua KF Drita, ku zhvilloi një pjesë të rëndësishme të karrierës së tij si futbollist. Ai luajti edhe për KF Studenti të Dobërçanit, për t’u rikthyer sërish te Drita. Në fushën e lojës aktivizohej si sulmues i majtë, ndërsa për shpejtësinë, pasimet dhe goditjet e fuqishme kishte fituar edhe nofkën “Kevin Keegan”, sipas një profili të publikuar për jetën dhe veprimtarinë e tij.
Lidhja e tij me KF Studenti ishte po ashtu e veçantë. Klubi nga Dobërçani, i themeluar në vitin 1975, e ka pasur Shengyl Imanin ndër futbollistët e parë dhe kapitenin e parë të skuadrës. Me rastin e 50-vjetorit të klubit, ai kishte rikujtuar me nostalgji atë periudhë, duke e cilësuar si njërën ndër kohët më të bukura të jetës së tij.
Angazhimi i Imamit në futboll nuk përfundoi me karrierën si lojtar. Ai vazhdoi të mbetet i lidhur me Dritën edhe në cilësinë e donatorit dhe organizatorit, ndërsa për dy vjet, gjatë periudhës 2005–2007, shërbeu edhe si drejtor i klubit.
Një tjetër dëshmi e pasionit të tij për futbollin ishte edhe historia e transparentit “Prishtina Kampion”, të cilin e kishte përgatitur dhe shpalosur në vitin 1983, kur Prishtina u inkuadrua në Ligën e Parë të ish-Jugosllavisë. Pas rreth katër dekadash, ai ia dhuroi këtë kujtim historik klubit prishtinas, në shenjë respekti për historinë dhe figurën e Fadil Vokrrit.
Sot, Shengyl Imami njihet në Gjilan edhe për veprimtarinë e tij afariste dhe kontributin në jetën shoqërore e kulturore të qytetit.
Fotografia e publikuar është një tjetër rikthim në kujtesën sportive të Gjilanit, duke sjellë në vëmendje brezat e futbollistëve që përmes përkushtimit dhe pasionit ndërtuan një pjesë të historisë së Dritës dhe të futbollit në këtë qytet.
