Universiteti Publik “Kadri Zeka” promovoi Programet Studimore para maturantëve të Komunës së Kamenicës

Në kuadër të aktiviteteve për promovimin e programeve studimore dhe informimin e të rinjve për mundësitë që ofron, Përfaqësues të Universitetit Publik “Kadri Zeka” zhvilluan një takim me maturantët e Komunës së Kamenicës.

Ky aktivitet kishte për qëllim prezantimin e programeve akademike, orientimin profesional të maturantëve dhe njohjen e tyre me mundësitë që universiteti ofron për zhvillim akademik dhe profesional.

Në takim morën pjesë një numër i madh maturantësh dhe përfaqësues të institucioneve arsimore në Kamenicë, të cilët shprehën interesim të veçantë për programet studimore, mundësitë e bursave, mobilitetin dhe aktivitetet studentore.

Në emër të Universitetit Publik “Kadri Zeka”, Dekani Prof. Dr. Xhevat Sopi prezantoi programet studimore që ofron universiteti, duke theksuar përkushtimin institucional për ngritjen e cilësisë në arsim dhe përgatitjen profesionale të studentëve.

Ai para maturantëve u shpreh se universiteti vazhdon të jetë një institucion i hapur për të rinjtë që synojnë dije cilësore dhe zhvillim profesional. “Universiteti Publik ‘Kadri Zeka’ ofron programe studimore bashkëkohore, staf akademik të përgatitur dhe mundësi të shumta për zhvillim profesional.

Ne jemi të përkushtuar që studentëve tanë t’u ofrojmë një arsim cilësor dhe një mjedis që nxit inovacionin, kreativitetin dhe përgatitjen për tregun e punës,” tha Prof. Dr. Xhevat Sopi.

Dekani gjithashtu inkurajoi maturantët që të vazhdojnë studimet e tyre universitare dhe të investojnë në ngritjen profesionale dhe akademike.

Në këtë aktivitet mori pjesë edhe drejtori i Drejtorisë së Arsimit në Kamenicë, Selami Klaiqi, i cili vlerësoi rëndësinë e organizimeve të tilla për orientimin e maturantëve drejt zgjedhjeve të duhura akademike dhe profesionale.

Ai theksoi se bashkëpunimi ndërmjet institucioneve të arsimit parauniversitar dhe universiteteve është shumë i rëndësishëm për të ardhmen e të rinjve. “Takime të tilla janë shumë të nevojshme për maturantët tanë, pasi u ndihmojnë atyre të njihen më afër me programet studimore dhe mundësitë që ofrojnë universitetet publike. Arsimi mbetet investimi më i rëndësishëm për të ardhmen e secilit të ri dhe ne do të vazhdojmë të mbështesim iniciativa që kontribuojnë në orientimin dhe zhvillimin e tyre profesional,” u shpreh Selami Klaiqi.

Gjatë takimit, Arlinda Selmani, ushtruese e detyrës së Udhëheqëses së Divizionit për Karrierë dhe Alumni, prezantoi mundësitë që universiteti ofron për zhvillim personal dhe profesional, duke folur për shërbimet e karrierës, trajnimet, praktikat profesionale dhe programet e mobilitetit për studentët. Ajo theksoi rëndësinë e përfshirjes së studentëve në aktivitete zhvillimore dhe krijimin e lidhjeve me tregun e punës që nga periudha e studimeve.

Gjatë takimit maturantët patën mundësinë të parashtrojnë pyetje dhe të marrin informacione të detajuara lidhur me drejtimet studimore, kriteret e regjistrimit dhe mundësitë që ofron Universiteti Publik “Kadri Zeka”