Kushtrim Kadriu: “S’kemi kapacitete”, Partia “Vatra” nga Gjilani tërhiqet nga zgjedhjet parlamentare
Lëvizja Qytetare “Vatra”, me seli në Gjilan, ka konfirmuar se nuk do të marrë pjesë në zgjedhjet parlamentare të 7 qershorit.
Kjo parti është në mesin e subjekteve politike që deri më tani kanë njoftuar zyrtarisht Komisionin Qendror të Zgjedhjeve për mospjesëmarrje në procesin zgjedhor. Po ashtu, nga rajoni i Gjilanit në listën e partive që nuk do të garojnë figuron edhe “Bashkimi për Ndryshim Anamorava”.
Lidhur me këtë vendim, kryetari i “Vatrës”, Kushtrim Kadriu, ka deklaruar se partia ka vendosur bashkë me strukturat dhe anëtarësinë të mos përfshihet në garën parlamentare, duke vlerësuar se aktualisht fokusi dhe kapacitetet e subjektit mbeten kryesisht në nivel lokal.
“Ne si lëvizje politike jemi deklaruar për mospjesëmarrje në zgjedhjet parlamentare, duke i ditur kapacitetet tona, por edhe duke parë disponimin qytetar, pasi qytetarët tashmë janë lodhur nga zgjedhjet e përsëritura”, ka deklaruar Kadriu.
Ai ka shtuar se zgjedhjet e shpeshta kanë ndikuar në zbehjen e motivimit politik, si te anëtarësia ashtu edhe te qytetarët.
“Për këtë arsye kemi vendosur të mos marrim pjesë drejtpërdrejt në zgjedhje. Duke pasur parasysh situatën politike, ekziston mundësia që edhe pas pak muajsh të ketë zgjedhje të reja, gjë që ka ndikuar në disponimin e përgjithshëm politik”, është shprehur ai.
Kadriu theksoi se subjektit të tij ende nuk i ka diskutuar opsionet e tjera të mundshme të përfshirjes apo mbështetjes politike në këto zgjedhje.
