UKZ zgjedh katër prorektorët e rinj – Këshilli Drejtues miraton edhe Planin e Veprimit Institucional 2026-2027
Gjilan, 6 Gusht 2026 – Këshilli Drejtues i Universitetit Publik “Kadri Zeka” në Gjilan ka zgjedhur katër prorektorët e rinj të institucionit.
Mbledhja u mbajt më 06. 08. 2026 nën udhëheqjen e kryesueses Liza Rexhepi, në bazë të propozimit të ushtrueses së detyrës së Rektores Fitore Malaj dhe pas njoftimit të Senatit.
Sipas njoftimit zyrtar të UKZ-së, janë zgjedhur:
- Detrina Alishani – Prorektore për Mësimdhënie dhe Çështje të Studentëve
- Arben Sahiti – Prorektor për Bashkëpunim Ndërkombëtar dhe Projekte
- Lindita Loku – Prorektore për Hulumtime dhe Kërkime Shkencore
- Voglushe Kurteshi – Prorektore për Zhvillim Akademik dhe Cilësi
Në këtë mbledhje, Këshilli Drejtues shqyrtoi dhe miratoi edhe një sërë çështjesh të rëndësishme për funksionimin dhe zhvillimin e universitetit.
Ndër to u miratua edhe Plani i Veprimit Institucional për periudhën gusht 2026 – tetor 2027.
“Me zgjedhjen e katër prorektorëve, Universiteti Publik ‘Kadri Zeka’ synon të forcojë qeverisjen akademike dhe të avancojë proceset e mësimdhënies, kërkimit shkencor, bashkëpunimit ndërkombëtar dhe zhvillimit”, thuhet në njoftimin e UKZ-së.
