Shtëpia Botuese “Beqir Musliu” në panairin e librit “Presheva 2025”, promovon “Uni i ndarë”, libri i fundit i autores, Kaltrinë Berisha
Shtëpia Botuese merr pjesë në panairin e librit “Presheva 2025”, i cili do të mbahet më 21 dhe 22 qershor në Shtëpinë e Kulturës – Preshevë.
Në ditën e dytë të panairit SHB “Beqir Musliu” do të promovoj librin e autores së re, Kaltrinë Berisha. -Kështu ka njoftur kryetari i saj, z. Sabit Rrustemi, përmes faqes së tij në rrjete sociale.
“Shtëpia Botuese “Beqir Musliu” nga Gjilani, përveç se merr pjesë me botimet e saj në Panairin e Librit në Preshevë, më 21 – 22 qershor 2025, ditën e dytë përuron dhe librin e poetes së re nga Gjilani, Kaltrinë Berishës, “Uni i ndarë” në Shtëpinë e Kulturës në Preshevë, nga ora 13:00”.
Bashkë me autoren e librit poetik, do të jenë dhe dy kritikë letrar, Nexhat Rexha e Arsim Halili që do të flasin për vlerat e librit.
“Po, sigurisht nuk do të mungoni as ju… lexues të dashur! – Jeni të mirëpritur!”, ka shkruar më tej z. Rrustemi.
Kujtojmë që Me moton domethënëse “Presheva flet”, më 21 dhe 22 qershor, në Shtëpinë e Kulturës në Preshevë, do të mbahet Panairi i Parë i Librit në Preshevë, një ngjarje historike për jetën kulturore të Luginës dhe më gjerë. Ky edicion i parë vjen si dëshmi e gjallë e etjes për dije, gjuhë dhe identitet në një nga trevat më të përkushtuara për ruajtjen e kulturës shqiptare.
Panairi është organizuar nga Biblioteka e qytetit “Mehmet Jusufi” si dhe nga institucione të kulturës dhe arsimit të kësaj zone, në bashkëpunim me shtëpi botuese nga Shqipëria, Kosova dhe Maqedonia e Veriut.
Në qendër të këtij bashkëpunimi është edhe Shtëpia Botuese Albas, e cila këtë vit jo vetëm që është bashkorganizatore e panairit, por feston një moment të veçantë në historinë e saj: 25-vjetorin e krijimit.
