PSG dominon në “Anfield” dhe siguron biletën për gjysmëfinale
Paris Saint-Germain ka konfirmuar formën e shkëlqyer në Ligën e Kampionëve, duke eliminuar Liverpoolin me një tjetër fitore bindëse, kësaj radhe në “Anfield”.
Skuadra e drejtuar nga Luis Enrique triumfoi 2-0 në ndeshjen e kthimit, duke e çuar rezultatin e përgjithshëm në 4-0 dhe duke kaluar me meritë në gjysmëfinale.
Takimi nisi i balancuar, me të dyja skuadrat që treguan kujdes në fazën defensive. Megjithatë, vendasit u goditën në pjesën e parë kur Hugo Ekitike u detyrua të largohej për shkak dëmtimi në minutën e 31-të, duke i lënë vendin Mohamed Salah. Liverpooli pati disa mundësi për të kaluar në epërsi, por portieri i PSG-së, Matvey Safonov, u tregua vendimtar me pritje ndaj Milos Kerkez fillimisht dhe më pas ndaj Cody Gakpos dhe Rio Ngumohas në pjesën e dytë.
Një moment i diskutueshëm erdhi në minutën e 65-të, kur Liverpooli kërkoi penallti pas një ndërhyrjeje nga Willian Pacho, por pas rishikimit me VAR, gjyqtari Maurizio Mariani vendosi të mos akordojë faull.
PSG goditi në momentin kyç të ndeshjes në minutën e 72-të, kur Khvicha Kvaratskhelia asistoi për Ousmane Dembele, i cili finalizoi saktë për epërsinë 1-0. Në kohën shtesë, Dembele vulosi gjithçka me golin e dytë personal në minutën 90+1’, duke i dhënë fitores përmasa të qarta.
Me këtë sukses, PSG avancon në gjysmëfinale, ndërsa Liverpooli i jep fund rrugëtimit të tij në Evropë për këtë sezon.
