PSG shpallet kampion i Francës për herë të pestë me radhë
Paris Saint-Germain ka hyrë në histori të futbollit francez, pasi siguroi titullin e pestë radhazi në Ligue 1 falë fitores 2-0 ndaj RC Lens në stadiumin Stade Bollaert-Delelis.
Triumfi në duelin direkt me ndjekësin më të afërt vulosi edhe matematikisht kurorëzimin e parisienëve si kampionë të Francës.
Ndeshja u parapri nga polemika, pasi Lens kishte kundërshtuar më herët shtyrjen e takimit, duke argumentuar se kjo i kishte dhënë PSG-së më shumë kohë për t’u përgatitur për përballjen ndaj Liverpool FC në UEFA Champions League.
Skuadra vendase e nisi më mirë sfidën dhe krijoi disa raste të rrezikshme për gol. Portieri Matvey Safonov u tregua vendimtar për mysafirët, duke bërë ndërhyrje të rëndësishme që mbajtën portën e paprekur.
Megjithatë, PSG arriti të godasë në momentin kyç të takimit. Ousmane Dembélé rikuperoi topin në mesfushë dhe shërbeu për Khvicha Kvaratskhelia, i cili realizoi me qetësi për avantazhin 1-0.
Lens vazhdoi të insistojë për golin e barazimit edhe në pjesën e dytë, por pa sukses përballë Safonovit. Në minutat shtesë, Ibrahim Mbaye vulosi fitoren me golin e dytë, duke i dhënë PSG-së titullin e 14-të kampion në histori.
Edhe pse paraqitja nuk ishte ndër më dominueset e skuadrës së drejtuar nga Luis Enrique, objektivi kryesor u arrit. Tashmë PSG synon ta përmbyllë sezonin me dy trofe të mëdhenj – Ligue 1 dhe Ligën e Kampionëve.
