Liga e Kampionëve /Atletico Madrid dhe PSG avancojnë në gjysmëfinale pas dueleve dramatike
Atletico Madrid dhe Paris Saint-Germain kanë prerë biletën për në gjysmëfinale të Ligës së Kampionëve, pasi eliminuan Barcelonën dhe Liverpoolin në dy përballje mjaft interesante.
Në “Metropolitano”, Barcelona fitoi 1-2 në ndeshjen e kthimit, por kjo nuk i mjaftoi për kualifikim. Skuadra katalanase kishte humbur 0-2 në takimin e parë, duke bërë që Atletico Madrid të kalojë tutje me rezultat të përgjithshëm 3-2.
Barcelona e nisi vrullshëm sfidën, duke kaluar në avantazh që në minutën e 4-të me Lamine Yamal. Epërsia u dyfishua në minutën e 24-t, kur Ferran Torres realizoi pas një asistimi të Dani Olmo, duke rritur shpresat për rikthim.
Megjithatë, reagimi i vendasve erdhi shpejt. Në minutën e 31-të, Ademola Lookman shënoi për 1-2, gol që në fund rezultoi vendimtar për kualifikimin e Atletico Madridit.
Në përballjen tjetër, Paris Saint-Germain konfirmoi epërsinë ndaj Liverpoolit, duke fituar 0-2 edhe në transfertë. Protagonist absolut ishte Ousmane Dembele, i cili realizoi të dy golat për skuadrën franceze.
Fillimisht, ai shënoi në minutën e 72-të pas një asistimi nga Khvicha Kvaratskhelia, ndërsa në kohën shtesë realizoi sërish, këtë herë pas pasimit të Bradley Barcola. Me këtë fitore dhe suksesin 2-0 në ndeshjen e parë, PSG kaloi bindshëm me rezultat të përgjithshëm 4-0.
Në fazën gjysmëfinale, Atletico Madrid do të ndeshet me fituesin e çiftit Arsenal – Sporting CP, ndërsa PSG pret rivalin që do të dalë nga dueli Bayern Munich – Real Madrid.
