POZHARAN / Trajneri, PERPARIM LIVOREKA JEP DORËHEQJE NGA VLLAZNIA
POZHARAN, 4 Tetor 2026 – Perparim Livoreka ka dhënë dorëheqje nga pozita e kryetrajnerit të KF Vllaznia e Pozhoranit, që garon në Ligën e Dytë.
Lajmin e konfirmoi vetë tekniku përmes një statusi në rrjetet sociale, ku falënderoi klubin, lojtarët dhe tifozët për mbështetjen gjatë qëndrimit të tij një vit e gjysmë në krye të ekipit pozhoranas.
“Ishte një sezon i jashtëzakonshëm”
Në letrën e dorëheqjes, Livoreka kujtoi arritjet e sezonit të kaluar dhe zhvillimin e lojtarëve.
“Dua t’i falënderoj të gjithë përkrahjen dhe mbështetjen gjatë një viti e gjysmë sa isha pjesë e këtij klubi, veçanërisht për sezonin e kaluar, i cili ishte i jashtëzakonshëm, ku ishim pretendentë për t’u inkuadruar në ligë”, shkroi ai.
Ai theksoi me krenari edhe faktin se shumë futbollistë të asaj gjenerate tani janë pjesë e Ligës së Parë:
“Krenohem edhe me faktin se shumica e futbollistëve që ishin pjesë e ekipit tonë sezonin e kaluar sot luajnë në ligën e parë. Kjo është dëshmi e punës së palodhshme, përkushtimit dhe angazhimit të përbashkët gjatë gjithë sezonit.”
Falënderim për tifozët “Tigrat”
Livoreka nuk e harroi as mbështetjen e tifozerisë së Vllaznisë.
“Një falënderim i veçantë për tifozët tanë ‘Tigra’, përkrahjen, besimin dhe atmosferën që na dhuruan gjatë gjithë kësaj kohe. Mbështetja juaj ka qenë shumë e rëndësishme për mua dhe për ekipin.”
Në fund të statusit, ish-trajneri u shpreh se largohet me respekt dhe i uroi suksese klubit.
“Largohem me respekt dhe mirënjohje për të gjithë ata që ishin pjesë e këtij rrugëtimi. Vllaznisë së Pozhoranit i dëshiroj shumë suksese në të ardhmen! Faleminderit nga zemra të gjithëve.”
Dorëheqja e Livorekës vjen në prag të ndeshjeve të radhës në Ligën e Dytë, ndërsa drejtuesit e Vllaznisë pritet të shpallin së shpejti emrin e trajnerit të ri.
