PDK: Kërkojmë seancë urgjente për miratimin e ligjit që mbron UÇK-në
Partia Demokratike e Kosovës i ka bërë thirrje kryetares së Kuvendit, Albulena Haxhiu që të thërrasë me urgjencë seancën plenare për përmbylljen e miratimit të ligjit që, siç ka thënë ky subjekt, mbron UÇK-në, çlirimtarët dhe historinë tonë.
“Sot, institucionet dhe përfaqësuesit politikë kanë përgjegjësi të veprojnë pa vonesë. Ky moment kërkon vendimmarrje në interes të shtetit dhe përmbushje të detyrimeve ndaj përpjekjeve të popullit tonë për liri”, thuhet në komunikatën e PDK-së pas mbledhjes së kryesisë.
Sipas PDK-së, ky subjekt e ka iniciuar këtë ligj pas takimeve dhe konsultimeve me të gjitha partitë politike shqiptare, me bindjen se mbrojtja e UÇK-së dhe e çlirimtarëve është përgjegjësi e përbashkët shtetërore.
“Ky ligj është më i madh se secila parti: ai lidhet drejtpërdrejt me të kaluarën, të tashmen dhe të ardhmen e shtetit të Kosovës. Prandaj, miratimi i tij kërkon unitet politik dhe përgjegjësi ndaj vendit”, thotë PDK.
Për PDK-në, prioriteti i menjëhershëm është përmbyllja e miratimit të ligjit në dy lexime.
“Kuvendi duhet ta përfundojë këtë proces pa zvarritje të mëtejshme dhe t’i japë përgjigje kërkesës së qytetarëve për mbrojtje të denjë të çlirimtarëve”, theksohet tutje në komunikatë.
PDK rithekson se nuk ka asnjë pengesë ligjore apo procedurale për miratimin e këtij ligji.
“Pengesë nuk paraqet as opinioni i vetë Qeverisë. Nuk ka as arsye politike që ky proces të mbetet i papërfunduar: nëse ka pasur vota të mjaftueshme për miratimin në lexim të parë, i njëjti vullnet duhet të dëshmohet edhe në lexim të dytë. Kjo kauzë kombëtare nuk duhet të shndërrohet në pazar politik apo të përdoret për kushtëzime partiake. Mbrojtja e UÇK-së dhe e çlirimtarëve kërkon dinjitet, përgjegjësi dhe vendimmarrje”, thekson PDK.
Gjithashtu, PDK ka dënuar ashpër dhunën joproporcionale të ushtruar nga Policia e Kosovës ndaj protestuesve. Sipas këtij subjekti politik ushtrimi i dhunës jashtë standardeve të ndërhyrjes policore është i dënueshëm dhe krejtësisht i papranueshëm.
“Protesta është e drejtë e çdo qytetari. Qytetarët kanë të drejtë të shprehin kundërshtimin ndaj vendimit në Hagë dhe të kërkojnë miratimin e ligjit në lexim të dytë. Kjo e drejtë duhet të respektohet dhe të mbrohet nga institucionet”, thekson tutje komunikata e partisë më të madhe opozitare.
PDK ka kërkuar nga Qeveria, Kryeministri dhe Ministria e Punëve të Brendshme, siç thuhet në komunikatë, të ndalin menjëherë veprimet e tyre jashtë rolit dhe kompetencave të tyre kushtetuese e ligjore dhe të mos e nxisin apo përdorin Policinë për ta shtypur me dhunë protestën dhe kërkesën e drejtë të qytetarëve.
“Asnjë urdhër politik nuk mund ta justifikojë përdorimin e forcës joproporcionale që mbrëmë ka lënë të lënduar shumë qytetarë. PDK shpreh solidaritetin dhe mbështetjen e plotë për secilin qytetar të lënduar gjatë protestës në këtë kauzë kombëtare”, thuhet tutje.
PDK në fund ka theksuar se do të ndërmarrë të gjitha veprimet e nevojshme dhe do t’i adresojë në Inspektoratin Policor të Kosovës të gjitha rastet e evidentuara të dhunës dhe tejkalimit të autorizimeve.
“Kërkojmë hetim të plotë dhe llogaridhënie për përgjegjësinë në urdhërimin dhe zbatimin e këtyre veprimeve”, thekson PDK.
