Vazhdojnë reagimet për ambulancën në Kishnapolë – Këshilltari i PDK-së Bujar Nevzadi: “Zonja Drejtoreshë, mos e maskoni mospunën me sqarime”
Gjilan, 04.11.2026 – Bujar Nevzadi, këshilltar komunal nga PDK në Gjilan, i është përgjigjur sot sqarimit të Drejtoreshës së Shëndetësisë dhe Mirëqenies Sociale, Mimoza Kadriu, lidhur me ndërprerjen e shërbimit ambulantor në Kishnapolë.
Isufi ka hedhur poshtë arsyetimin e DSHMS-së se bëhet fjalë për “ndërprerje të përkohshme” deri në rekrutimin e stafit të ri.
Reagimi i plotë:
“ZONJA DREJTORESHË, MOS E MASKONI MOSPUNËN ME SQARIME!”
“Ju e keni ditur me kohë se punëtori i ambulancës në Kishnapolë do të dalë në pension. Për më tepër, tash e tetë muaj keni paralajmëruar konkursin për rekrutimin e stafit, por nuk e keni hapur asnjëherë!”, shkruan Nevzadi.
Ai ngre pyetjen: “Pse nuk u morët me këtë çështje me kohë? Pse duhet të jenë qytetarët ata që i vuajnë pasojat e mungesës së planifikimit tuaj?”
Sipas tij, sqarimi i DSHMS-së për numër të vogël pacientësh dhe “organizim të përkohshëm” është i papranueshëm.
“Tash po flisni për numër të vogël të pacientëve dhe organizim të përkohshëm, por patronazhi dhe urgjenca nuk e zëvendësojnë ambulancën!”, thekson këshilltari i PDK-së.
Isufi ka bindjen se ky sqarim është “përpjekje për të manipuluar opinionin publik dhe për ta arsyetuar një dështim institucional”.
“Qytetarët nuk kanë nevojë për arsyetime, por për shërbime shëndetësore. Kishnapola nuk meriton të mbetet pa ambulancë për shkak të papërgjegjësisë së institucioneve!”, përfundon ai.
“Zonja Drejtoreshë, përgjegjësia nuk është të reagoni pasi të krijohet problemi, por ta parandaloni atë me kohë!”
Kujtojmë se DSHMS njoftoi më 02.11.2026 për ndërprerje të përkohshme të shërbimit në ambulancën e Kishnapolës deri në rekrutimin e stafit të ri, duke ofruar numrat e patronazhit dhe urgjencës.
Ndërkaq PDK Dega Gjilan reagoi dje duke kërkuar rikthim të menjëhershëm të shërbimit dhe arsyetim publik.
