PDK-ja mblidhet sot, në fokus rikthimi i mundshëm i Fatmir Limajt në listën zgjedhore
Kryesia e Partisë Demokratike të Kosovës (PDK) do të mbajë sot një mbledhje, ku pritet të diskutohet për rikthimin e mundshëm të Fatmir Limajt në strukturat zgjedhore të partisë dhe përfshirjen e tij në listën e kandidatëve për deputetë.
Lajmi është raportuar nga disa media, ndonëse deri më tani nuk ka pasur ndonjë njoftim zyrtar nga PDK-ja.
Mbajtjen e mbledhjes e ka konfirmuar për Telegrafin ish-deputeti i kësaj partie, Mergim Lushtaku.
Sipas raportimeve, Fatmir Limaj të premten i ka dërguar një letër kryetarit të PDK-së, Bedri Hamza, përmes së cilës ka kërkuar të përfshihet në listën e kandidatëve për deputetë pa asnjë kusht.
Kjo kërkesë ka nxitur diskutime dhe reagime brenda partisë.
Mergim Lushtaku është shprehur në favor të rikthimit të Limajt në PDK, duke theksuar se çështja duhet të trajtohet nga organet vendimmarrëse të partisë.
Ai ka deklaruar se personalisht e mbështet këtë ide, por se vendimi përfundimtar do të merret nga Kryesia e PDK-së.
Fatmir Limaj, i konsideruar si një nga themeluesit e PDK-së, nga mbështetësit e tij shihet si figurë që mund ta fuqizojë partinë në prag të zgjedhjeve të 7 qershorit.
