PDK Gjilan bën homazhe për Masakrën e Llashticës në 27-vjetorin e saj

Kreu i degës së PDK-së në Gjilan, Riad Rashiti, së bashku me deputetin Arben Mustafa dhe zyrtarë të tjerë, nderojnë viktimat e masakrës

Në 27-vjetorin e Masakrës së Llashticës, dega e PDK-së në Gjilan ka bërë homazhe përkujtimore në nderim të 26 civilëve të vrarë gjatë luftës së vitit 1999.

Homazhet u bënë nga kreu i degës së PDK-së në Gjilan, Riad Rashiti, së bashku me deputetin e Kuvendit të Kosovës nga Gjilani, Arben Mustafa, këshilltarin komunal Bujar Nevzadi si dhe anëtarë të tjerë të degës së PDK-së në Gjilan.

Masakra e Llashticës, e ndodhur më 13 prill 1999, mbetet një nga ngjarjet më të rënda të luftës në Kosovë, ku forcat serbe vranë dhe masakruan 26 civilë shqiptarë, përfshirë gra, fëmijë dhe të moshuar.

Në këtë përvjetor, Riad Rashiti ka bërë edhe një postim përkujtues, duke theksuar rëndësinë e kujtesës dhe drejtësisë për viktimat.

Postimi i plotë i Riad Rashitit:

“Sot, në përvjetorin e 27-të, nderuam dhe përkujtuam të rënët për lirinë e Kosovës.
Masakra e Llashticës mbetet një nga ngjarjet më të dhimbshme të luftës së vitit 1999. Më 13 prill të atij viti, forcat serbe sulmuan fshatin, duke vrarë e masakruar 26 civilë shqiptarë, përfshirë gra, fëmijë dhe të moshuar të pafajshëm.
Kjo tragjedi është dëshmi e vuajtjeve të mëdha të popullit tonë dhe një kujtesë e përhershme për drejtësi, kujtesë dhe mosharresë.
Lavdi të përjetshme të rënëve.”