Procedura të reja në Aeroportin e Prishtinës, udhëtarët këshillohen për check-in online
Aeroporti Ndërkombëtar i Prishtinës Adem Jashari ka njoftuar për disa përditësime në procedurat e udhëtimit, të cilat kanë hyrë në fuqi nga 1 prilli 2026, me synim lehtësimin dhe përshpejtimin e procesit të fluturimeve.
Sipas njoftimit zyrtar, udhëtarët këshillohen të kryejnë check-in online dhe të mbajnë kartën e imbarkimit në telefon ose të printuar. Pasagjerët që nuk kanë bagazh të regjistruar mund të drejtohen direkt në portën e nisjes.
Po ashtu, rekomandohet që udhëtarët të paraqiten në aeroport të paktën tre orë para nisjes së fluturimit, për shkak të procedurave të imbarkimit dhe mbylljes së check-in-it.
Autoritetet u bëjnë thirrje pasagjerëve që të respektojnë oraret e përcaktuara nga linjat ajrore dhe të plotësojnë me saktësi të dhënat personale gjatë check-in-it online, pasi çdo gabim mund të shkaktojë vonesa apo probleme gjatë udhëtimit.
Udhëtarëve u sugjerohet gjithashtu të informohen paraprakisht për fluturimet e tyre dhe të ndjekin udhëzimet e linjave ajrore për një përvojë sa më të lehtë dhe efikase.
