Pas largimit nga Presidenca, Vjosa Osmani shfaqet në Gjilan – sinjale për rikthim të fuqishëm në politikë?
Vetëm pak ditë pasi përfundoi mandatin si presidente, Vjosa Osmani është shfaqur në Gjilan, në një takim me gratë e këtij qyteti, duke nxitur spekulime për hapat e saj të ardhshëm në politikë [ raporton TV Gjilani.
Takimi u mbajt në restaurantin “Nanat”, një biznes i udhëhequr nga gra, ku Osmani bashkëbisedoi për sfidat e përditshme me të cilat përballen gratë dhe rëndësinë e mbështetjes së ndërsjellë. Ajo e cilësoi këtë takim si frymëzues, duke vënë në pah rolin e grave në shoqëri.
“Gratë dhe nanat shqiptare janë shtylla e familjes dhe e shtetit tonë, burim force, qëndrueshmërie dhe zhvillimi shoqëror”, theksoi Osmani, duke veçuar kontributin e grave të Gjilanit ndër vite.
Megjithatë, përtej mesazheve sociale, prania e saj publike vjen në një moment kyç: ende nuk dihet nëse Osmani do t’i rikthehet Lidhja Demokratike e Kosovës apo do të ndërmarrë një hap të ri politik duke themeluar një subjekt të ri, siç është përfolur së fundmi.
Dalja e saj e parë publike pas mandatit po shihet nga analistët si një sinjal i mundshëm për rikthim në skenën politike – por mbetet për t’u parë nëse ky rikthim do të vijë brenda strukturave ekzistuese apo përmes një rruge krejtësisht të re.
