Nga Silvana Begaj, Suedi: Shqipërisë i duhet përgjegjësi politike, ajo fillon nga maja!
Edi Rama: Nuk ka bir nëne të ketë një provë që ju kam marrë një qindarkë!
Nuk ka bir nëne që nuk e di se nën drejtimin tuaj krimineli u bë zyrtar, mik i pushtetit dhe përfitues i tenderave publikë.
Silvana Begaj, opinioniste
Nuk ka bir nëne që nuk i ka parë skandalet, dosjet e SPAK-ut, AKSHI-n, Ergys Agasin, ministrat, kryebashkiakët e drejtorët që kanë përfunduar nën hetim apo akuzë e së fundmi SHISH!
Ju thoni: “Nuk ka bir nëne që provon se kam marrë një qindarkë.”
Por Kryeministri nuk paguhet vetëm për të mos vjedhur vetë( duke ju prezumuar ashtu si e quani veten). Paguhet për të drejtuar shtetin dhe për të mbajtur përgjegjësi për pushtetin që ndërton dhe drejton.
Nuk mund të jeni ju merita për çdo sukses, ndërsa për çdo skandal fajin ta ketë gjithmonë dikush tjetër.
Prandaj, këto fjalimet patetike e frymëzuese, me dorën në zemër, poza morali dhe fjalë pompoze, na i kurseni.
Pas kaq vitesh në pushtet, nuk mjafton më: “Nuk dija. Nuk pashë. Nuk mora.”
Shqipërisë i duhet përgjegjësi politike. Dhe përgjegjësia fillon nga maja.
