Mekanizmi Koordinues Lokal në Viti diskutoi rritjen e rasteve të dhunës në familje
Në Viti u mbajt mbledhja e rregullt e Mekanizmit Koordinues Lokal për Mbrojtjen nga Dhuna në Familje, Dhuna ndaj Grave dhe Dhuna në Baza Gjinore, ku u diskutuan rastet e raportuara gjatë këtij viti, sfidat në trajtimin e viktimave dhe nevoja për forcimin e bashkëpunimit ndërinstitucional.
Në fjalën hyrëse, kryetari i Komunës së Vitisë, Sokol Haliti, i cilësoi shqetësuese statistikat e fundit të rasteve të dhunës në familje. Ai theksoi se dhuna në familje dhe dhuna në baza gjinore përbëjnë një plagë të rëndë shoqërore dhe shkelje të të drejtave të njeriut, duke ritheksuar qëndrimin institucional për zero tolerancë ndaj çdo forme të dhunës.
Haliti tha se Komuna e Vitisë mbetet e përkushtuar jo vetëm në reagimin institucional, por edhe në parandalimin e kësaj dukurie përmes edukimit dhe mbështetjes së viktimave. Në këtë drejtim, ai përmendi ligjëratat vetëdijesuese të organizuara në shkolla në bashkëpunim me Policinë, si dhe bashkëpunimin me Qendrën për Mbrojtjen e Grave “Liria”, përmes së cilës viktimave u ofrohet mbështetje psikologjike, juridike dhe sociale. Ai nënvizoi se mbrojtja e viktimave nuk duhet të mbetet vetëm zotim, por të jetë përgjegjësi dhe angazhim i përbashkët institucional e shoqëror.
Për rastet e raportuara gjatë këtij viti foli zëvendëskomandanti i Policisë në Viti, toger Burim Musliu, i cili bëri të ditur se deri më tani janë evidentuar 56 raste të dhunës në familje, krahasuar me 46 raste sa ishin regjistruar gjatë vitit të kaluar. Ai prezantoi edhe procedurat që ndiqen për trajtimin dhe mbrojtjen e viktimave, ndërsa propozoi që takimet e këtij mekanizmi të mbahen më shpesh, me qëllim të koordinimit dhe reagimit më efikas të institucioneve.
Ndërkaq, Sylë Salihu nga Qendra për Punë Sociale raportoi se gjatë këtij viti janë evidentuar 44 raste të reja, 14 raste të bartura nga vitet paraprake dhe 7 raste të përsëritura.
Një çështje tjetër që ngjalli diskutim ishte trajtimi i personave me çrregullime mendore, të cilët në raste të caktuara paraqesin sfida për institucionet përgjegjëse. Drejtoresha e Qendrës për Mbrojtjen e Grave “Liria”, Nazife Jonuzi, ngriti shqetësimin për mungesën e institucioneve të specializuara për trajtimin dhe strehimin e këtyre personave, duke theksuar se rastet e tilla kërkojnë vlerësim profesional dhe trajtim adekuat në institucionet përkatëse.
Gjatë mbledhjes diskutuan edhe Gani Leci, mbrojtës i viktimave në kuadër të Prokurorisë, si dhe Ibadete Hyseni nga Zyra Komunale për Barazi Gjinore në Viti.
Në përfundim të diskutimeve, si një nga nevojat e rëndësishme u theksua krijimi i kapaciteteve të specializuara për trajtimin e personave me çrregullime mendore, përfshirë ndërtimin e një spitali psikiatrik, duke marrë parasysh mungesën e hapësirave dhe kapaciteteve të mjaftueshme në repartet ekzistuese psikiatrike.
Pjesëmarrësit vlerësuan rëndësinë e bashkëpunimit dhe koordinimit të vazhdueshëm ndërmjet institucioneve, me qëllim të parandalimit të dhunës, mbrojtjes së viktimave dhe trajtimit më efektiv të rasteve të raportuara.
