Shqipëria mposht Finlandën 2-0, vendin e parë në grup mund ta sigurojë të dielën
Kombëtarja e Shqipërisë ka shënuar fitore të merituar 2-0 ndaj Finlandës, në stadiumin “Air Albania”, duke bërë një hap të rëndësishëm drejt përmbushjes së objektivit në Grupin C1.
Kuqezinjtë zhvilluan një paraqitje bindëse, ndërsa protagonistë të fitores ishin Ernest Muçi dhe Rey Manaj, të cilët realizuan nga një gol.
Epërsinë Shqipërisë ia dha Ernest Muçi në minutën e 35-të, me një goditje të fuqishme dhe precize me të djathtën, duke dërguar topin në këndin e sipërm të portës finlandeze.
Në minutën e 50-të, Rey Manaj dyfishoi rezultatin. Pas një krosimi të saktë nga Elseid Hysaj, sulmuesi u shkëput në zonë dhe me goditje me kokë e dërgoi topin në rrjetë për 2-0.
Shqipëria e administroi me sukses epërsinë deri në fund të takimit, ndërsa Finlanda nga minuta e 67-të luajti me një futbollist më pak, pas përjashtimit me karton të kuq të Miro Tenho.
Me këtë fitore, Shqipëria arrin në kuotën e 12 pikëve dhe forcon pozitën në vendin e parë të Grupit C1. Bjellorusia renditet e dyta me 10 pikë, ndërsa Finlanda mbetet me 7 pikë.
Ndeshja e së dielës kundër Bjellorusisë do të jetë vendimtare për përcaktimin e pozitave përfundimtare në grup. Kombëtares shqiptare i mjafton një barazim për të ruajtur vendin e parë.
Fitorja ndaj Finlandës e vendos Shqipërinë në një pozitë të favorshme para kësaj përballjeje, duke i dhënë mundësinë që fazën e grupit ta përmbyllë në krye të renditjes.
