Në UKZ-së ka qëndruar një delegacion nga Iowa e SHBA-së
20 Qershor, 2025 – Rektori i Universitetit Publik “Kadri Zeka” në Gjilan, Prof. Asoc. Dr. Artan Dërmaku, së bashku me stafin e tij, ka pritur sot në një takim zyrtar një delegacion të lartë nga shteti i Iowa-s, SHBA, të udhëhequr nga Gjenerali në pension Timothy Orr. Delegacioni përfshinte historianë, ushtarakë, përfaqësues të Universitetit të Iowa-s, veprimtarë dhe personalitete të tjera të shquara amerikane.
Në këtë vizitë morën pjesë edhe zëvendësministrja e Punëve të Jashtme të Kosovës, znj. Liza Gashi, si dhe Kryetari i Komunës së Gjilanit, z. Alban Hyseni me kabinetin e tij.
Rektori Prof. Asoc. Dr. Artan Dërmaku uroi mirëseardhje për delegacionin amerikan, duke i njoftuar të pranishmit me historikun, zhvillimin institucional dhe programet akademike të Universitetit Publik “Kadri Zeka”. Ai theksoi rëndësinë që UKZ i kushton ndërkombëtarizimit dhe ndërtimit të partneriteteve të reja me universitete prestigjioze në SHBA.
Kurse Kryetari i Komunës së Gjilanit, z. Alban Hyseni, përshëndeti takimin dhe vlerësoi bashkëpunimin ndërmjet komunës dhe universitetit si thelbësor për zhvillimin arsimor.
Gjenerali në pension Timothy Orr, në emër të delegacionit amerikan, falënderoi për mikpritjen dhe shprehu ndjenjën e veçantë që i është dhënë mundësia të rikthehet në Kosovë. Ai vlerësoi përparimin e universitetit dhe rolin e tij në shoqëri.
Në takim, përfaqësues të delegacionit prezantuan mundësitë që shteti i Iowa-s ofron për studentët ndërkombëtarë, si dhe ndanë përvoja personale nga angazhimi i tyre i mëhershëm në Kosovë , si ushtarakë, profesorë apo përfaqësues të institucioneve akademike.
Prorektori për Bashkëpunim Ndërkombëtar dhe Projekte në UKZ Prof. Dr. Dukagjin Leka, paraqiti të arriturat e UKZ-së në fushën e bashkëpunimeve ndërkombëtare dhe përfshirjen në programe prestigjioze si Fulbright, Korpusi i Paqes dhe të tjera, duke rikonfirmuar përkushtimin e universitetit për thellimin e bashkëpunimit me institucione amerikane.
Në përmbyllje të takimit, Rektori Prof. Asoc. Dr. Artan Dërmaku falënderoi delegacionin për vizitën dhe shprehu bindjen se kjo vizitë do të shërbejë si bazë për vendosjen e marrëdhënieve të qëndrueshme dhe bashkëpunime konkrete në të ardhmen.
