Mimoza Kadriu Qerimi: Nga sot polici në Qendrën për Punë Sociale në Gjilan për siguri më të madhe, si domosdoshmeri për një ambient të sigurt për punonjësit dhe qytetarët
Drejtoresha e DSHMS-së: “Është e domosdoshme të krijohet një ambient i sigurt për punonjësit dhe qytetarët”
GJILAN, 18 Nëntor 2026 – Duke filluar nga sot, në objektin e Qendrës për Punë Sociale në Gjilan është vendosur një zyrtar policor i Policisë së Kosovës.
Lajmin e ka bërë të ditur përmes një statusi në rrjete sociale drejtoresha e Drejtorisë për Shëndetësi dhe Mirëqenie Sociale, Mimoza Kadriu Qerimi.


Sipas saj, ky vendim është marrë me qëllim të rritjes së sigurisë së përgjithshme në institucion.
“Nga sot, në objektin e Qendrës për Punë Sociale në Gjilan është vendosur një zyrtar policor nga Policia e Kosovës. Ky hap synon rritjen e sigurisë në objekt, mbrojtjen e punonjësve gjatë ushtrimit të detyrave të tyre, si dhe vendosjen e rendit dhe rregullit në institucion” – ka shkruar Kadriu Qerimi.
Drejtoresha ka theksuar se siguria e stafit dhe funksionimi i rregullt i qendrës janë prioritet.
“Siguria e punonjësve, respektimi i rregullave dhe funksionimi i rregullt i institucionit janë përgjegjësi që kërkojnë veprime konkrete” – ka shtuar ajo.
Kadriu Qerimi ka shpjeguar edhe arsyen e këtij hapi, duke marrë parasysh natyrën e punës që bëhet në QPS.
“Duke pasur parasysh natyrën e ndjeshme të rasteve që trajtohen në QPS, është e domosdoshme të krijohet një ambient i sigurt, i qetë dhe me kushte të përshtatshme për punëtorët dhe qytetarët që marrin shërbime” – thuhet në statusin e saj.
Në fund, drejtoresha ka ripërsëritur përkushtimin e drejtorisë që ajo drejton.
“Drejtoria e Shëndetësisë dhe Mirëqenies Sociale mbetet e përkushtuar në fuqizimin e QPS-së, përmirësimin e kushteve të punës dhe ngritjen e cilësisë së shërbimeve sociale për qytetarët” – ka përfunduar ajo.
