Kryetari Alban Hyseni fton qytetarët të marrin pjesë në dëgjimin publik për Kornizën Afatmesme Buxhetore 2027–2029
Komuna e Gjilanit do të mbajë sot (e hënë) dëgjimin publik për Kornizën Afatmesme Buxhetore (KAB) 2027–2029, proces që synon të prezantojë planifikimet buxhetore për periudhën e ardhshme dhe të mbledhë propozimet e qytetarëve.
Përmes një njoftimi publik, kryetari i Komunës së Gjilanit, Alban Hyseni, ka ftuar të gjithë qytetarët e interesuar të marrin pjesë në këtë takim.
Dëgjimi publik do të mbahet sot, më 22 qershor, duke filluar nga ora 17:00, në objektin e SHMAP dhe Shkollës së Muzikës “Adem Kastrati” në Gjilan.
Sipas kryetarit Hyseni, takimi do të shërbejë për informimin e qytetarëve mbi prioritetet dhe planifikimet buxhetore të komunës për vitet 2027–2029, si dhe për paraqitjen e komenteve dhe propozimeve nga pjesëmarrësit.
Në njoftimin e Komunës së Gjilanit në faqe zyrtare është theksuar se pjesëmarrja e qytetarëve në këtë proces është e rëndësishme për hartimin e një planifikimi buxhetor sa më gjithëpërfshirës, transparent dhe në përputhje me nevojat e komunitetit.
Dëgjimi publik zhvillohet në një periudhë kur çështjet që lidhen me planifikimin buxhetor dhe vendimmarrjen në Kuvendin Komunal kanë qenë objekt i diskutimeve dhe mospajtimeve ndërmjet pozitës dhe opozitës në Gjilan për një kohë të gjatë.
