Japonia pranë befasisë, por Brazili përmbys gjithçka dhe kalon në 1/8 e finales
Brazili ka siguruar kualifikimin në 1/8 e Kupës së Botës 2026, pasi arriti një fitore dramatike 2-1 ndaj Japonisë, në një ndeshje që u vendos në minutat e fundit të kohës së rregullt.
Japonia e nisi më mirë takimin dhe arriti të mbyllë pjesën e parë në epërsi, falë një supergoli të Kaishu Sano në minutën e 29-të, duke i befasuar brazilianët dhe duke shkuar në pushim me avantazh minimal.
Në pjesën e dytë, Brazili reagoi fuqishëm duke rritur presionin dhe duke krijuar raste të shumta që në minutat e para. Portieri japonez Zion Suzuki u shqua me disa pritje vendimtare ndaj goditjeve të Bruno Guimarães dhe Casemiros, por nuk arriti ta ndalë golin e barazimit.
Në minutën e 56-të, Casemiro përfitoi nga një krosim i Gabrielit dhe me një goditje me kokë e çoi topin në rrjetë për 1-1.
Pas barazimit, “Seleção” vazhdoi dominimin në fushë, ndërsa Vinicius Junior ishte shumë pranë përmbysjes vetëm tre minuta më vonë, por goditja e tij u ndal nga një pritje fantastike e Suzukit, i cili devijoi topin në shtyllë.
Kur ndeshja po i afrohej fundit dhe dukej se do të shkonte në vazhdime, Brazili gjeti golin vendimtar në minutat shtesë të kohës së rregullt. Martinelli realizoi për 2-1, duke kompletuar përmbysjen e madhe.
Me këtë fitore dramatike, Brazili siguron kualifikimin në fazën tjetër të turneut, ndërsa Japonia largohet me një paraqitje shumë të mirë, por pa arritur ta mbajë epërsinë deri në fund.
