Hapet konkursi për pranim në Qendrën e Studentëve, Nagavci numëron kushtet në konvikte

Është hapur konkursi për regjistrimin e 4 mijë studentëve të rinj në Qendrën e Studentëve. Kjo u bë e ditur gjatë një vizite në këtë qendër që pati ministrja në detyrë e Arsimit, Arbërie Nagavci.

Derisa fliste për kapacitetet në konviktet ajo përmendi edhe investimet siç e potencon të konsiderueshme për një konvikt të ri.

“Nga sot deri me datën 20 konkursi do të hapet për regjistrimin e 4 mijë studentëve të cilët do të qëndrojnë edhe qëndrimi i plotë fjetja dhe ushqimi. Përtej saj qendra ka potencial për të ofruar diku 1 mijë e 500 studentëve mundësi që të ushqehen në kuadër të qendrës. Kushtet janë shumë të mira, i kemi bërë përgatitjet e nevojshme prej 4 mijë studentëve dhe 70 për qind janë kapacitete për vajza që regjistrohen si studente. Për shkak te mbështetjes vlera që do të paguajnë është simbolike 20 euro, qëndrimi pagesa mujore dhe 15 euro për ushqim. Rezultatet do të bëhen publike me datën 26 shtator dhe nga 1 tetori do të filloj vendosja e studentëve në konvikte. Përtej investimeve që bëhen konvikt pas konvikti në kuadër të buxhetit të paraparë për lojërat Olimpike është paraparë edhe një investim i konsiderueshëm edhe për ndërtimin e një konvikti të ri dhe përmirësimin e kushteve edhe infrastrukturës fizike në konvikte”, ka thënë Nagavci.