Futbollistja, Edona Kryeziu nga Rogana e Dardanës, nënshkruan me Dinamo Zagreb
Futbollistja e spikatur e ekipit përfaqësues të Kosovës, Edona Kryeziu, ka vendosur që karrierën e saj të vazhdoj në klubin më të madh kroat, Dinamo Zagreb.
Lajmin e ka publikuar faqja zyrtare e Turneut Tradicional “Rogana…”, duke nënvizuar se krahas angazhimit të saj në klubin kroat, Edona do të jetë e fokusuar edhe në ekipin A të reprezentacionit të Kosovës, në garat zyrtare në konkurrencën e femrave.
“… kemi nderin t’iu informojmë se bashkëvendasja jonë, Edona Kryeziu, e cila është një futbolliste me shumë suksese në karrierë, nga ky vit do të jetë pjesë e skuadrës kroate, Dinamo Zagreb. Edona, tash e sa vite është pjesë edhe e reprezenacionit të Kosovës dhe padyshim njeriu kryesor i formacionit bazë”, shkruan kjo faqe.
“Edona me sukseset e saj e ka bërë gjithmonë krenarë vendin tonë, e gjithashtu edhe tërë Republikën e Kosovës”, përfundon postimi i faqes Turneu Tradicional – “Rogana…”.
Kjo faqe përshkruan gjithashtu edhe aktivitetet që lidhen me turneun më masiv në troje etnike në futboll të vogël, e rrjedhimisht, për shkak të jehonës dhe masovitetit edhe aktivitetet e sportistëve të kësaj treve, me theks të vecantë futbollistëve që kanë dalë nga Rogana e mbarë Komuna e Kamenicës, sikurse edhe sportistët tjerë të kësaj treve.
