Fakulteti Juridik i UKZ bashkëorganizator në Kongresin Ndërkombëtar të Shkencave Humane, Shoqërore dhe Arteve të Universitetit të Tetovës
Universiteti i Tetovës ka mbajtur Kongresin Ndërkombëtar mbi Shkencat Humane, Shoqërore dhe Artet, një ngjarje akademike madhore që bashkon profesorë, studiues dhe ekspertë nga rajoni dhe më gjerë.
Kongresi përfshin një seri konferencash ndërkombëtare të fakulteteve të ndryshme, duke përfshirë Fakultetin e Ekonomisë, Fakultetin e Filologjisë, Fakultetin e Juridikut, Fakultetin e Filozofisë dhe Fakultetin e Pedagogjisë.
Në kuadër të këtij kongresi, Fakulteti Juridik i Universitetit Publik “Kadri Zeka” është bashkëorganizator i Konferencës Ndërkombëtare të Fakultetit Juridik, duke dëshmuar përkushtimin e tij të vazhdueshëm në fuqizimin e bashkëpunimit akademik rajonal dhe ndërkombëtar.
Fakulteti Juridik i UKZ-së u përfaqësua nga Dekanja, Prof. Asoc. Dr. Fatmire Krasniqi, e cila mori pjesë aktive në sesionet shkencore dhe diskutimet profesionale. Ajo kontribuoi në debatin akademik mbi sfidat bashkëkohore juridike, integrimin evropian, etikën profesionale dhe ndikimin e teknologjive të reja në sistemet ligjore, duke forcuar rolin e Fakultetit në arenën shkencore ndërkombëtare.
Në hapjen e kongresit, me një videomesazh nga Londra, Rektori i UT-së, Prof. Dr. Jusuf Zejneli, përshëndeti të pranishmit dhe i përgëzoi për kontributin e tyre në zhvillimin e dijes dhe të shkencës.
Prorektori për Shkencë, Prof. Dr. Vullnet Ameti, theksoi rëndësinë e këtij kongresi si një laborator idesh, vizionesh dhe transformimesh shoqërore. Ai nënvizoi se gjatë dy ditëve të punimeve do të prezantohen 265 punime shkencore nga mbi 450 autorë e bashkëautorë, në 25 sesione paralele dhe 4 seanca plenare, duke përfshirë fusha të ndryshme të dijes: gjuhësi, letërsi, ekonomi, filozofi, pedagogji dhe drejtësi.
Folësja kryesore e kongresit ishte znj. Majlinda Bregu, ish-Sekretare e Përgjithshme e RCC-së, e cila solli një analizë të thellë mbi rolin e arsimit, sfidat globale dhe transformimet shoqërore e teknologjike. Në mesazhin e saj, ajo theksoi se universitetet duhet të jenë hapësira të mendimit të lirë dhe inovacionit, duke paralajmëruar po ashtu për rreziqet e epokës së inteligjencës artificiale dhe mungesën e kontrollit etik.
Ky kongres, së bashku me bashkëorganizimin e Fakultetit Juridik të UKZ-së, dëshmon angazhimin e institucioneve të arsimit të lartë në avancimin e kërkimit shkencor, shkëmbimin e ideve dhe forcimin e bashkëpunimit akademik në rajon.
