Fakulteti Ekonomik realizoi vizitë studimore në sektorin bankar për studentët e marketingut
Fakulteti Ekonomik, në kuadër të angazhimit të vazhdueshëm për të ndërlidhur teorinë akademike me praktikën profesionale dhe në bashkëpunim të ngushtë me sektorin e biznesit, realizoi një vizitë studimore dhe praktike për studentët e profileve të marketingut. Kjo vizitë u zhvillua nën udhëheqjen e Prodekanit Prof. Ass. Dr. Lulzim Rashiti.
Vizita u mbajt në ambientet e Banka Kombëtare Tregtare, ku studentët patën mundësinë të njihen nga afër me funksionimin e marketingut në një institucion financiar modern. Përmes prezantimeve profesionale dhe diskutimeve interaktive me ekspertë të fushës, ata u informuan mbi strategjitë më të avancuara të marketingut bankar, përfshirë komunikimin me klientët, ndërtimin e brendit dhe përdorimin e kanaleve digjitale në promovimin e shërbimeve financiare.
Kjo përvojë praktike u vlerësua si një mundësi e rëndësishme për studentët, duke u mundësuar atyre të lidhin njohuritë teorike të fituara gjatë studimeve me realitetin dinamik të tregut të punës. Gjithashtu, studentët patën rastin të shtrojnë pyetje konkrete dhe të diskutojnë sfidat dhe trendet aktuale në industrinë bankare.
Në fjalën e tij, Prodekani Lulzim Rashiti theksoi rëndësinë e bashkëpunimeve të tilla për zhvillimin profesional të studentëve.
“Vizita të këtij lloji janë thelbësore për përgatitjen e studentëve tanë për tregun e punës. Ato jo vetëm që i ndihmojnë ata të kuptojnë më mirë aplikimin praktik të njohurive teorike, por gjithashtu krijojnë ura konkrete bashkëpunimi me institucionet relevante të sektorit privat. Fakulteti Ekonomik mbetet i përkushtuar që të zgjerojë këto partneritete në funksion të rritjes së cilësisë së studimeve dhe mundësive për studentët tanë,” ka thënë ndër tjerash Prodekani Rashiti.
Nga ana tjetër, përfaqësuesit e bankës prezantuan mundësitë konkrete për zhvillimin e praktikave profesionale dhe programeve të trajnimit për studentët, duke hapur perspektiva të reja për përfshirjen e tyre në tregun e punës. Këto iniciativa synojnë të lehtësojnë tranzicionin nga studimet akademike në karrierë profesionale dhe të kontribuojnë në zhvillimin e kuadrove të reja në sektorin financiar.
Fakulteti Ekonomik do të vazhdojë të organizojë aktivitete të tilla në të ardhmen, me synimin për të fuqizuar lidhjet me industrinë dhe për të ofruar përvoja sa më të vlefshme për studentët e tij.
